Irungo Udaleko Kultura arloak, Oiasso Erromatar Museoaren bidez, herritar guztiei jakinarazten dien ireki dela Navigium Isidisean parte hartzeko epea. Urtero bezala, herritar guztiei irekia egongo da ekitaldia, Dies Oiassonis erromatar jaialdiaren barruan (uztailak 13-16).
Navigium Isidis Isis jainkosari eskainitako prozesio bat zen. Antzinako Erroman ospatzen zuten, nabigazio-garaiari hasiera emateko. Isis marinelen eta itsasbidaien babeslea da, eta horrexegatik egiten zuten prozesio hau haren omenez. Dies Oiassonis erromatar jaialdia uztailaren 13tik 16ra egingo da aurten, eta Navigiumaren prozesioa ere antolatu da, uztailaren 15ean, larunbatarekin. Irundarren parte-hartzeari esker, ehun lagun baino gehiago ibiliko dira museoaren inguruko kaleetan, erromatarrez jantzita. Aurten, aurreko urteetan bezalaxe, izen-emateak ireki dira, iraganerako bidaia original honetan parte hartu nahi duten guztientzat.
Interesdunek 943 63 93 53 telefonora deituta edo Oiasso Museora joanda eman dezakete izena. Izen-abizenak eta kontaktu bat eskatu dizkiete (telefonoa eta/edo posta elektronikoa). Ondoren, ekainaren 15eko bilera informatibora joateko gonbita bidaliko zaie.
Horrez gain, toki libre batzuk geratzen dira oraindik Oiasso Museoko areto-tailerrean emango diren erromatar joskintzako tailerretarako. Ekainaren 3an eta 10ean izango dira, 10:00etatik 13:00etara. Interesdunek Museora dei dezakete harremanetan jartzeko: 943 63 93 53. Tailerra doakoa da, baina parte-hartzaileek jantzia egiteko oihala ekarri beharko dute. Aproposenak lihoa eta artilezko oihala dira.
Informazio gehiago behar izanez gero, jarri harremanetan Oiasso Museoarekin. Edozein aldaketa badago edo beste deialdi bat egiten bada, emandako kontaktuaren bidez jarriko dira haiekin harremanetan museokoak.
«Bidasoko atlas emozionala»
«Bidasoko atlas emozionala» aldi baterako erakusketa luzatu egin da, eta uztailaren 2ra arte egongo da ikusgai Oiasso Museoan. Bidasoaren memoria historiko eta emozionalekin elementu esanguratsuenak berrikusten ditu erakusketak, hamar gairen bidez, besteak beste: Bidasoa hitzaren etimologia eta generoa, haurtzaroko oroitzapenak, ofizio tradizionalak, ibaiak inspiratutako artea eta literatura, eta abar. Hain zuzen, horiek izan ziren herritarrek maizenik aipatutako gaiak, María José Noain Maurak eta Helga Massetani Piemontek egindako ikerketan. Erakusketa doakoa da, eta museoaren irekiera-orduetan bisitatu daiteke: ekainaren 1etik aurrera, 10:00etatik 20:00etara arte asteartetik larunbatera, eta 10:00etatik 14:00etara igandeetan.
