Mónica Martínez Informazioaren Gizarteko eta Herritarren Parte-hartzeko ordezkariak HAZek gaurtik aurrera irekitzen duen zerbitzu berria ezagutzera eman du. Zerbitzu horren bidez, herritarrei, enpresei, elkarteei eta hiriko gainerako erakundeei gune lagundu bat eskainiko zaie, Administrazio Publikoarekin eta, zehazki, Irungo Udalarekin izapidetze elektronikoa errazteko.
“Administrazioarekin egin beharreko izapide elektronikoak erabat finkatuta daude, eta, azken urteotan, Irungo Udala handitzen joan da herritarrek ordenagailu batetik egin dezaketen kudeaketa-kopurua. Beste urrats bat egin dugu, eta sarbide libreko Interneteko sarbidea duten bi postu sortu ditugu, administrazioarekin izapideak in situ egin ahal izateko, beharrezkoa bada laguntza emanez. Edozein arrazoirengatik baliabiderik ez duten edo beste zailtasunen bat duten pertsonek errazago erabili ahal izango dute zerbitzu hori”, adierazi du Mónica Martínezek.
Doako eta erabilera libreko zerbitzua da, eta HAZeko langileek eskainiko dute, eta hala nahi duten pertsona, enpresa, elkarte eta gainerako erakundeei lagundu egingo diete Irungo Udalari irun.org/egoitza elektronikoaren bidez zuzendutako izapide elektronikoak egiten. Halaber, gainerako administrazio publikoei zuzendutako beste izapide elektroniko batzuk egiteko aukera ere eskaintzen da, laguntzarik gabe.
Zerbitzu horren bidez, Herritarrentzako Arreta Zerbitzuak Administrazio Prozedura Erkideari buruzko 39/2015 Legearen ondoriozko egoerari erantzun nahi dio; izan ere, lege horren arabera, kolektibo jakin batzuk behartuta daude administrazio publikoekiko harremanak bide elektronikoz egitera. Zehazki, legeak ezartzen du ezen enpresek, sozietateek, elkarteek, klubek eta abarrek, eta baita nortasun juridikorik ez duten beste pertsona batzuek ere (ondasun-erkidegoak, jabe-erkidegoak, ABEak), derrigorrezko elkargoko lanbideez eta Administrazio Publikoetako enplegatuez gain, nahitaez erabili behar dituztela baliabide elektronikoak administrazio publikoarekin harremanak izateko.
HAZek eskaintzen duen zerbitzu berria adinekoentzako edo mugitzeko zailtasunak dituztenentzako irisgarritasun-irizpideak bermatuz konfiguratu da, eta Interneten sartzeko bi postu ditu, USB irakurgailuarekin eta paperezko dokumentuak eskaneatuta. Zerbitzu hori erabiltzeko, modu autonomoan erabiltzeko oinarrizko ezagutza informatikoak izan behar dira, eta Irun Txartela edo beste ziurtagiri elektroniko aitortu bat eduki, hala nola NAN elektronikoa, Izenpe ziurtagiria, FNMT ziurtagiria eta abar. Zerbitzua doakoa eta sarbide librekoa da; hala ere, erosoago izateko, hitzordua eskatzeko aukera ere eskaintzen da.
Udalaren egoitza elektronikoa
2004. urtean abian jarri zenetik,Irungo Udalaren egoitza elektronikoak hazkunde progresiboa eta geldiezina izan du, 2014an Irun Txartela atera zenetik, eta 2021. urtean, COVIDaren pandemiaren eta derrigorrezko konfinamenduaren eraginez, kopuru errekorra izan zuen, 30.400 eskaera baino gehiago izan zituen eta. 2022an, egoitza elektronikoaren bidez erregistratutako eskaeren kopurua pixka bat jaitsi da kopuru horretatik, baina 2021 baino lehenagoko kopurua gainditu du. Zehazki, aurten 28.131 eskaera egin dira egoitza elektronikoaren bidez.
Udalaren egoitza elektronikoaren bidez 2022an erregistratutako izapide nagusiak, instantzia/eskaera orokorrez eta dokumentazioa aurkezteaz gain, honako hauek izan dira: eskola-materiala erosteko laguntza-eskaerak; kiroldegietan Eskola Kirolean eta Solasen izena ematea, eta udalak argitaratutako diru-laguntzetarako eskabideak aurkeztea. Tramite horien ondotik, obrak egiteko baimen eskaerak eta establezimenduak bonu-kanpainetara atxikitzeko eskaerak.
Egoitza elektronikoa erabiltzen duen jendeari dagokionez, 2022an egindako izapideen % 71 pertsona fisikoak izan dira, eta % 29 enpresak, elkarteak eta gainerako erakundeak.
