1981ean koltza-olioak eragindako intoxikazio masiboak kon-tsumitzaileen mugimenduak piztu zituen. Gure eskualdean Bidasoako Kontsumitzaileen Elkartea -ACUBI- eratu zen. Kontsulta kopuruak gora egin du, urtean 1.800era ere iritsi dela.
Elikagaien inguruko kexen garaia atzean geratu da eta gaur egun bizilagunen komunitateak, alokairuak eta telefonia dira kontsulta eta erreklamazio iturri, besteak beste.
– Zein dira zerbitzu honen estatistika nagusiak?
Aurten, irailaren 25era arte 1.350 kontsulta egin dizkigute. Nik uste dut 1.800era iritsiko garela urte bukaerarako. Azken urteotan horixe izan da kopuru orokorra.
– Datu horiei erreparatuta, bidasoarrok aktiboak garela esan daiteke?
Bai, hala da. Acubik zenbait elkarterekin hitzarmenak sinatu ditu jarduerak aurrera eramateko.
Gure informazio lanari esker bidasoarrak, erreklamatzera baino, bulegora batik bat kontsultak egitera etortzea lortu dugu.
– Krisiak aldaketak eragin ditu kontsumitzaileengan?
Bai. Gaur egun kontsumitzaileek erosketa bat egiteko orduan sakonago pentsatzen dute behar duten ala ez. Bestalde, aurrezteko xedez, fakturak arreta handiagoz aztertzen dituzte. Adibide oso arrunta jarriko dut: telefono konpainiaz aldatzen da jende asko. Arazoa da, prezioaz gain, askok eta askok ez dietela eskaintzen zaizkien bestelako zerbitzuei erreparatzen, eta hortik arazoak sortzen dira.
– Zein dira erreklamazio eta kontsulta iturri nagusiak?
Kopuruen arabera, hurrenez hurren aipatuko ditut.
– Bizilagunen komunitateak: bilerak, aktak, fakturak, kuoten ordainketa eza…
– Alokairuak: alde batetik, kontratu zaharrak dituzten jabeek ez dute argi zer ordaindu behar duten maizterrek, eta, bestetik, Alokairuen Lege berriak ekarri dituen aldaketak kontsulta-gai dira. Eta, jakina, maizter berantiarrak arazo iturri dira.
– Aseguru-etxeak, odontologoak eta preferenteak: alor hauen inguruko kexak berriki agertzen hasi zaizkigu.
– Telefonia: fakturazioa, altak, bajak, estaldurak, eramangarritasuna, premium mezuak…
– Elektrizitatea eta gasa: fakturazioa egiten duen enpresaz aldatzeak dakartzan arazoak.
– Erabiltzen ez diren etxebizi-tzen jabeei Udalak ezarri dien higiezinen gaineko zergaren % 50eko igoera.
– Kontsulta askok erreklamazioaren bidea hartzen dute?
Bai, kontsulta askoren hurrengo urratsa erreklamazioa izan ohi da. Jendeak, gutxienez, saiatu nahi du.
– Zeinek izan ohi du arrazoia: enpresak ala kontsumitzaileak?
Batzuetan enpresak, besteetan kontsumitzaileak. Beti ez da argi egoten enpresak egiazko informazioa eman duen ala ez. Dena den, kon-tsumitzaile gisa behar adina galdera egiteko ohitura hartu behar dugu, eta ez soilik prezioari erreparatu.
ACUBIren zerbitzuak
ACUBI Elkarteak 1984an ekin zion lanari, eta 1989az geroztik bulegoa Foruen Karrikan dauka, zerbitzua behar duen orori irekia. Edozein enpresari/elkarteri /jaberi buruzko kontsultak egin daitezke bertan, baina erreklamazioa egiteko derrigorrezkoa da ACUBIko bazkide izatea. Abokatu baten zerbitzua dauka, beharrezkoa den kasuetan kontsultak erantzuteko.
ACUBIk ez ditu kudeatzen saltoki/enpresetako erreklamazio-orriak.
Kontsumitzailearen Informazio Udal Bulegoak ere erreklamazioak izapidetzen ditu, baina erabiltzaileak Irunen erroldatua egon behar du, eta enpresak ere, bertan kokatua.
