La Agricolako nagusi Carlos Sagastizabali jatetxearen bigarren urtebetetzea ospatzea otu 
zitzaionean, Gaztelumendi-Antxoneko Felix Manso chefarekin harremanetan jarri zen. Handik aitzina, hilabete eta erdiz, sukaldean elkarrekin aritu ziren bakailaoa ardatz izango zuen menu berezia apailatzeko. Esplorazioa, irudimena, jolasa, sormena. Lau hitzetan laburbil daiteke esperientzia. Ekainaren 12an La Agricolara bildu zirenek lanaren emaitzaz gozatu zuten.
Bi lagun elkarlanean, lagunak limurtzeko.
Izozki antza zuen kornetea izan zen bazkaltiarrek dastatu zuten estreinako gutizia. Tontorrean mahats-pasez betetako bakailao tripakia zeraman eta beste hiru geruza zituen: bakailao krematsua, parmigiano gazta eta, kukurutxoaren bukaeran, txokolate pittin bat.
Kabrarroka-kremazko ogi txigorraren ondoren, bakailaora buelta, hirukote batez lagunduta: piper erreak, gazta eta intxaurrak, guztiak ekialdeko zaporeen ukitua zeukala. Arrautza Arabako patata bioletekin eta onddoekin aurkeztu zuten. Bakailao-azpizuna, berriz, errege-sagarrezko saltsarekin eta bizkaitarrarekin. Azkenik, kataluniar krema Armagnacez, platanozko izozkiarekin eta almendrekin.
“Bakailaoa menuaren osagai nagusitzat erabili dugu izugarri atsegin dudalako eta produktu hau sukaldatzen esku ona daukadalako”, adierazi zuen Carlos Sagastizabalek. “Oso gustura sentitzen naiz bakailaoa prestatzen”.
Bakailaoaren hautaketa
“Bakailaoa Dasta Ezazu” Bidasoako bakailao enpresen elkartea arduratu zen afarirako maila 
goreneko bakailaoa aukeratzeaz. “Tripakia arrain honek berezko duen maskuria da”, azaldu zuen Alberto Santiago enpresariak. “Bertara sartzen duen aire kopuruaren arabera uretan igotzeko edo jaisteko baliatzen du”. Bakailaozko lehendabiziko platera lantzeko, kilo bat baino gehiagoko arrainen solomoak hautatu zituen, eta nagusirako, 2 kilotik gorakoenak.
Ardoak
Luxuzko menu hau laguntzeko ardoen hautaketa Satrustegi ardo banatzaileen enpresako Alberto Estebanen lana izan zen. Onartu zuen ez zela kontu erraza izan, “bakailaoak ezaugarritzen zuelako menua”. “Ohiko menuetan, ardo zuriarekin hasi eta beltzarekin bukatzen da, baina oraingoan justu aurkakoa egin dut”. Hasierako urdaiazpikoarekin Toroko Madremia beltz-beltza uztartu zuen. Bi pintxoek Errioxako Martinez Alesanco ardandegietako upelan hartzitutako zuria izan zuten lagun, “arrainari ongi dagokiolako”.
“Ondoren, arriskatu egin nin-tzen, aipatu ardandegietako ardo beltz gaztearen aldeko apustua egin bainuen; hau da, beltza eta arraina uztartu nituen”. Arrautzarekin edateko, Laus gorria hautatu zuen, eta bakailao-azpizuna bustitzeko, Albariño bat, Rias Baixas jatorri-izendapenekoa.
“Postrearekin, Ruedako Yllerak merkaturatu duen berrikuntza bat: verdejo frizzantea, gozoa, alkohol gutxikoa, oso erraz edaten dena”.
Barriolak urdai azpikoa moztu zuen
“Barriola Ebakitzaile Maisuak” enpresako Joxe Mari Barriolak, aperitifa gisa eskaini zen urdaiazpikoa hautatzeaz gain, bertan ebaki zuen. “Kordoban jaiotako txerriarena da, gero Burgosen ondutakoa, hiru urte eta erdiz”. “Denbora hori igarotakoan urdai azpikoa bere heldutasunean dago”, esan zuen adituak. Mimo guztiarekin eta goi mailako teknologiaren laguntzaz hazi eta ondutakoa dela azpimarratu zuen. “Ezaugarri guztien gainetik produktua moztu berritan jatea da sekretua”.
