Larunbatean 20:30etan Moskun arrazakeriaren eta indarkeriaren kontra egiteko elkarretaratzea deitu dute hiriko hainbat eragilek

Larunbatean arratsaldeko 20:30etan Moskun elkartzeko deialdia zabaldu dute hiriko zenbait eragilek. Helburua arrazakeria eta indarkeriaren kontra egitea da. Deialdiak azken asteetan zehar sare sozialen bitartez indarkeria arrazista zabaltzeko mezuen aurkako jarrera azaltzeko helburua du. Hiriko hainbat denda, ostalaritza establezimendu, elkarte eta abar batu dira La Kaxita gaztetxearen sare sozialetan zabaldutako elkarretaratze deialdira.

Honakoa dio sare sozialen bitartez zabaldutako elkarretaratze deialdiak:

Faxismoaren aurrean, arrazismoaren aurrean, gurea Harrera Auzoa.

Ahopeka ibili ohi den faxismoa lotsagabe agertu zaigu gure herri eta auzoan, Moskun. Gure plazan jazo zen gazte magrebiar baten hilketa txalotu ostean, “Vamos a darles caña a los Moros rateros” lelopean indarkeria arrazista zabaltzeko deialdia zabaldu dute, dirudienez, duela gutxi, Irungo beste auzo batean gertatutako ustezko lapurketa saiakera bat tarteko. Larunbata 25, gaueko 22.00etan, “todo el mundo en Moscú (irun) bamos a darles caña a los moros rateros” dio deialdiak. Mozorroak erantzirik, harrotasun osoz, oldarraldi faxista bati bide emateko saiakeran.

Egoera larri honen aurrean, herriko eta auzoko jende, eragile, elkarte, taberna, komertzio etabar ezberdinetakoak elkartu gara. Ez ditugu horrelako jarrera faxista eta arrazistak onartzen gure auzo eta herrian, eta ez dira ongi etorriak. Are gehiago, alde egin dezatela eta bakean utz gaitzatela eskatzen dugu.

Honegatik, hau sinatzen dugunok argi diogu:
– Larunbatean, irailak 25, 22.00etarako egin den deialdi faxista, arrazista eta indarkerizkoa guztiz arbuiatzen dugula.

– Horrez gain, azken aldian areagotzen ari diren jarrera eta ekintza faxistek (izan jatorri arrazista, homofobiko, matxista edota klasistak) ez dutela lekurik ez Moskun ez inon.

Bide batez, ageriko arazo honen atzean dagoenaren inguruan hausnarketa konpartitu nahi genuke. Kontziente gara egungo fluxu migratorio izugarriaz. “Fluxu” hauek pertsonak dira eta askotan baldintza tamalgarriei aurre eginez heltzen dira gurera, akituta, batzuek hilzoria gaindituta. Honen aurrean ezin dugu beste alde batera begiratu. Gure auzoak eta herriak pertsona hauei harrera egiteko konpromisoa hartu beharrean daude. Hauen zaintzan engaiatzeko eta honela, gure plaza ere kolore, kultura, hizkuntza eta harreman berriz aberasteko. Mosku harrera auzoa izan da eta izango da, gehien behar dutenen aterpe.

 

Utzi erantzuna

Zure e-posta helbidea ez da argitaratuko. Beharrezko eremuak * markatuta daude