Gaur, abenduaren 5ean, Boluntariotzaren Nazioarteko Eguna da. Data hau aprobetxatuz, Minbiziaren Aurka Gipuzkoan-ek elkartea osatzen duten 900 boluntario baino gehiagok egiten duten lana ospatu eta eskertu nahi du. Era berean, gizartea boluntario bihurtzera animatu nahi du.
Minbiziaren Aurka Gipuzkoan elkarteak 934 boluntario ditu probintzia osoan zehar dituen egoitzetan banatuta: 331 Donostialdean, 179 Bidasoaldean, 158 Tolosaldean, 99 Urola-Garaia Goierri, 82 Debabarrenan eta 85 Urola Kostan.
Elkarteak, batez ere, minbizia duten pertsonei eta haien senideei aurrea hartu, sentsibilizatu eta lagundu nahi die, baita minbizia hobeto diagnostikatu eta tratatzeko ikerketa onkologikoko proiektuak finantzatu ere. Horregatik, elkarteak helburu argi bat du: elkarteko boluntarioen familiarekin bat egin nahi duten pertsona gehiago bilatzea.
Leire Vallespir, Minbiziaren Aurka Gipuzkoan-eko boluntarioen koordinatzaileak dioenez, “boluntarioen elkarte bat gara, eta boluntarioen ezinbesteko lanari esker, gure jarduera aurrera eraman dezakegu”. Gainera, Vallespir-ek elkarteko kide diren 900 boluntario baino gehiagoren inplikazioa eskertu nahi du eta gipuzkoarrei dei bat egin nahi die: “badakigu Gipuzkoa oso gizarte solidarioa dela, horregatik, nahi duen oro animatzen dut gure boluntario-taldearekin bat egitera”.
Boluntariotza motak
Minbiziaren Aurka Gipuzkoan elkartean hainbat boluntario mota daude. Gipuzkoa osoan zehar egin daitezke boluntario lanak. Paziente eta senideekin lan egiten duten boluntarioak akonpainamendua eta laguntza eskaintzen dizkiete ospitaleetan eta etxeetan, kontsulta medikoetara eta tratamenduetara joaten laguntzen diete eta etxetik kanpo oinarrizko kudeaketak egiten laguntzea. Bestetik, baliabideak lortzeko kanpainetan parte hartzen duten boluntarioak daude edo, besterik gabe, kanpainetan eta ekitaldietan parte hartzen dutenak.
Vallespir-ek dioen bezala, boluntariotza egitea “bizitzan izateko modu bat da. Elkartasunari esker hobekuntza eta aldaketa posibleak direla jakitea da, zuk jartzen duzun harri-koskorra zure egoera eta erabilgarritasunera gehien egokitzen den eran eskaintzea da”. Horregatik, gizarte osoa animatzen dute bere taldeko kide izatera eta, bere denborarekin, pazienteei eta haien senideei laguntzera.
