Tabakoaren kontsumoa prebenitu daitekeen heriotza-kausa nagusiena da. Urtero, munduan 8 milioi pertsona baino gehiago hiltzen dira tabakoaren ondorioz; horietatik 7 milioi tabakoa zuzenean kontsumitzeagatik hil dira, eta 1,5 milioi inguruk ez dute zigarrorik piztu. Espainian bakarrik, tabakoak 50.000 pertsona baino gehiago hiltzen ditu urtero, eta hori da
minbizi kasu guztien %30en eta 20 minbizi mota desberdinen %30eko erantzulea. Besteak beste, birika, laringe, pankrea, maskuri, hestegorri edo gibeleko minbiziak.
Gizarteak, tabakoaren kontsumoaren eta minbiziaren arteko zuzeneko harremana onartuta dauka. Baina, zer gertatzen da tabakoaren kearekin? Herritarrek ez dute minbizia sortzeko arriskurik sumatzen ke toxiko hori arnasten dutenean. Hala ere, frogatuta dago ke horrek minbizia eragiten duela, minbizia eragiten duten 70 substantzia baino gehiago baititu. Eta ez, kea ez da aire zabalean desagertzen. Adingabeak dauden espazio publikoen %100ean, osasunerako kaltegarriak diren
tabako-kearen arrastoak daude; adibidez, terrazen %95ean, ikastetxeen sarbideen %46an edo haur-parkeen %43an. Azken datu bat: zigarrokin itzali batek %14ko nikotina askatzen jarraitzen du, gutxienez 24 orduz.
Gizartea mobilizatzeko kanpaina
Minbiziaren Aurka Gipuzkoan sustatzen duen kanpainaren helburua kerik gabeko espazio berriak sortzea da. Hori lortzen laguntzeko, elkarteak herritarrak informatu eta sentsibilizatu nahi ditu, komunitatea eraldatu ahal izateko.
Horretarako, hainbat ekintza burutu dira urtean zehar, eta maiatzaren 31n ospatuko den Tabakorik Gabeko Munduko Egunarekin itxiko dira:
• Urtarriletik berrogeita hamar pertsona inguru artatu dira erretzeari uzteko terapia jasotzeko.
• Elkartea Tolosan eta Ordizian egon da, DBHko 3. eta 4. mailetako 350 ikasle baino gehiagorekin, tabakoaren eta kanabisaren kontsumoari buruz hausnartzen.
• Urtarrilean topaketa bat egin zen Why Not fundazioan tabakismoari eta gaixotasun mentalari buruz hitz egiteko. Aita Menni Fundazioaren beste bi zentrorekin ere izan dira Donostian maiatzaren 11n eta Irunen maiatzaren 24an.• Debabarrena eskualdeak, ESIaren gidaritzapean eta elkartearen partaidetzarekin, argazki lehiaketa bat jarri du abian “Eman arnasa planetari. Erretzeak kutsatu egiten du” kontzeptuarekin. Maiatzaren 31n jakinaraziko da irabazlea.
• Maiatzaren 31 arte, kerik gabeko guneei buruzko erakusketa bat ikusi ahal izango da Ipurua kiroldegian, Eibarren.
• Erakusketa bera Irun eta Azpeitiko Gaztelekuetan egongo da ikusgai maiatzaren 31 arte.
• Maiatzaren 31n (asteartea), 17:30ean, Irungo hirian, nerabeei zuzendutako gai honi buruzko tailer bat egingo da.
Hau guztia, 2030ean 18 urte betetzen dituzten pertsonek inoiz erre ez dezaten lortzeko helburuarekin egiten da. Horrela, hurrengo belaunaldia tabakorik gabekoa izatea lortu nahi da.
