Miren Echeveste Berdintasuneko ordezkariak ostiral honetan aurkeztu du prentsaurrekoan indarkeria sexistaren alorrean erakundeen artean arreta emateko eta koordinatzeko protokolo berria. Miren Echevestek gogorarazi du Udalbatzak aho batez eman ziola oniritzia dokumentuari joan den asteko osoko bilkuran, eta azaldu duenez, “protokoloa indarrean dagoen IV. Berdintasun Planetik sortu da, eta lehendik zegoena berritu du. Gainera, dokumentua egiteko prozesu luze honetan, emakume-elkarte eta –entitateek parte hartu dute, eta hau izan da emaitza. Irungo Udalak orain arte egindako lan guztia jasotzen du lan honek; izan ere, ibilbide luzea egin baita indarkeria sexistaren emakume eta adingabe biktimei arreta ematen.
Echevesten esanetan, Protokoloaren ardatz nagusiak dira biktimei arreta ematea, kasuren bat gertatuz gero erantzun publikoa ematea eta erakundeen artean koordinatzea; izan ere, protokolo hau harago doa, eta udalaren arreta-zerbitzuez gainera, beste eragile batzuk ere biltzen ditu, koordinazio-mahai baten bidez, hala nola Osakidetza eta Ertzaintza. “Helburu nagusia, jakina, protokoloa ez aktibatzea da, baina Udala garen aldetik, aurrera egin nahi dugu prebentzioan eta erakundeen arteko lankidetzan, funtsezkoa baita biktimak babesteko, eta, jakina, gaitz hori gure gizartetik desagerrarazten borrokatu eta lagundu nahi dugu”.
Biktima izatea ez areagotzeko eta zerbitzu bakoitzak osagarria izan dadin nola jokatu behar duen ezartzeko, koordinazio-mahaiaren eginkizunak, funtsean, egindako lanak bateratzea eta urtero Berdintasun Zerbitzuak aurkeztutako jarduerei buruzko datu orokorrak aztertzea izango dira. Berdintasuneko teknikariek urtero aztertuko dituzte protokoloan dauden zerbitzu eta erakundeek bidalitako datuak, eta txosten bat egingo dute, eta erakunde arteko koordinazio-mahaiari aurkeztuko diote, eztabaidatzeko eta ekintzak eta/edo neurriak abian jartzeko. Alde horretatik, Miren Echevestek gogorarazi du Udaleko gizarte-zerbitzuek gizarte-langile bat daukatela indarkeria sexistaren kasuetarako bakarrik.
Protokoloak genero-indarkeriaren aurkako Estatu Itunaren finantzaketa izan du, eta erantzun publikoa emateko eskema bat ere badauka, gerta daitezkeen eraso sexista guztien aurrean hainbat mailatan aktibatzen dena. Horretarako, erantzun-agertoki bereiziak ezartzen ditu, eskubide-urraketaren larritasuna kontuan hartuta. Oinarrizko jarraibide batzuk egongo dira egoera posible guztietan jarduteko; besteak beste, biktimarekin eta haren ingurukoekin harremanetan jartzea, haren egoerari egokitutako baliabideak eskaintzea eta behar den zerbitzura bideratzea, erasoari buruzko informazioa biltzea arretan inplikatutako erakundeekin koordinatuta (Ertzaintza, Osakidetza, Gizarte Ongizate…), eta/edo gizarte-eragileekin koordinatzea (elkarteak, mugimendu feminista,…).
