Tech Irun UDA Tailerrek oso balorazio positiboarekin eman diote amaiera beren hamargarren urteurrenari, eskainitako plazen % 100 beteta. Guztira, 8 eta 13 urte bitarteko 80 haurrek parte hartu dute uda honetan Irungo Udalak Bidasoa bizirik-ekin lankidetzan antolatutako proposamen teknologikoetan. 2017an martxan jarri zirenetik, ekimenak erabat sendotu du bere lekua hiriko udako eskaintzan, eta hamar edizio hauetan 1.100 haur baino gehiagori eman dio teknologiara modu praktiko, sortzaile eta dibertigarrian hurbiltzeko aukera.
Urteurren honek metodologia praktiko baten aldeko apustua egin du berriro ere, haurrek esperimentatuz, sortuz eta hainbat erronkari irtenbidea bilatuz ikas dezaten. Saioak Irun Factoryn garatu dira bi adin-taldetan banatuta (8 eta 10 urte bitartekoak batetik, eta 11 eta 13 urte bitartekoak bestetik), eta lau arlo tematiko nagusi landu dituzte: «Misioa: espaziorako bidean», «Musika, artea eta teknologia», «Arkeologia robotikoa» eta «Natura: zientzia eta teknologia».
Jarduera horiei esker, parte-hartzaileek robotika, elektronika, sentsoreak, domotika, 3D modelaketa zein bideo-jokoen sorkuntza bezalako eremuak ezagutzeko aukera izan dute. Ezagutza teknologiko espezifikoak eskuratzeaz gain, tailerrek sormena, pentsamendu logikoa, arazoak konpontzeko gaitasuna eta talde-lana bultzatu dituzte, parte-hartzaileen arteko lankidetza sustatuz eta Irungo belaunaldi berriak etorkizun digitalerako prestatuz.
Genero-arrakala, etorkizuneko erronka
Aurtengo 2026ko edizioan 19 neskak eta 61 mutilek hartu dute parte, hau da, parte-hartzaileen % 23,75 eta % 76,25, hurrenez hurren. Datuek familien artean programak duen arrakasta berresten badute ere, aldi berean etorkizunera begirako erronka nagusietako bat azaleratzen dute: nesken parte-hartzea handitzea. Bidasoa bizirik-eko presidente Nuria Alzagak azpimarratu duenez, lehentasunezko lan-ildoa izango da zientzia zein teknologia arloetan oraindik dagoen genero-arrakala txikitzea, gero eta neska gehiagok txikitatik robotikan, programazioan edo 3D diseinuan beren gaitasunak ezagutu ditzaten.
