Cristina Laborda Irungo alkateak Bidasoa Behereko Hiri Drainatze Jasangarriaren Plana aurkeztu du Málagan egindako Greencities, Urban Intelligence & Smart Mobility kongresuan. Ekimenaren helburu nagusia da uraren kudeaketa hobetzea, eurialdi bortitzei nahiz uholde-arriskuei aurrea hartzea eta hiria zein eskualdea klima-aldaketaren ondorioen aurrean erresilientego egitea. Alkateak azpimarratu duenez, zero arriskua existitzen ez den arren, prebentziozko neurri honek hiria seguruago bihurtzea eta erronkei garaiz erantzutea ahalbidetuko du.
Txingudiko Zerbitzuek prestatutako plan honek 34 milioi euroko inbertsioa jasotzen du datozen hamar urteetarako. Neurri zehatzen artean daude euri-urak aldi baterako biltzeko putzu berriak eraikitzea, euri-uren eta saneamendu-sareen arteko banaketa hobetzea zein eremu ahulenetan esku hartzea, hala nola Anaka eta Hondarribiko ibarbideetan. Horrez gain, ponpaketa-estazioak eta gainezkabideak modernizatuko dira azpiegitura osoaren efizientzia bermatzeko.
Proiektua eskualdeko erakundeen arteko lankidetzaren emaitza da, eta Udalaren Larrialdietarako Plana nahiz garapen jasangarriaren aldeko apustu integrala osatzen du, mugikortasuna, efizientzia energetikoa eta hiri-eremuen birnaturalizazioa ere ardatz izanda.
