Irunek 2026ko Sanpedro eta Sanmartzial Jaien hasiera ofiziala bizi izan du ekainaren 23an San Juan Plazan. Aurten, Itziar Vergara mediku, ikertzaile eta Biogipuzkoako zuzendari zientifikoa izan da jaien agur ofizialaren protagonista nagusia, udaletxeko balkoitik zientziaren eta osasun-sistema publikoaren defentsa sutsua egin duen hitzaldi baten bidez. Ekitaldian zehar, Cristina Laborda alkateak lagunduta egon da Vergara, eta plazan bildutako milaka herritarrek txaloz eta jai-giroan hartu dute mezu argi eta konprometitu hau.
Ekitaldi instituzionala udaletxearen barruan hasi da, non Vergarak alkatearekin bilera bat izan duen bere bulegoan, Areto Nagusira elkarrekin sartu aurretik. Bertan, senitartekoekin, udal-ordezkariekin eta aurreko urteetako pregoilariekin batera, topa tradizionala egin eta jaien hasierako emozioak partekatu dituzte. Ondoren, San Martzialen ereserkia entzuten zen bitartean, udal-agintariak San Juan Plazara jaitsi dira Kemen Dantza Taldeak eta Irungo Txistulari Taldeak ohorezko aurreskua eskain ziezaieten, balkoitik hitz egiteko une itxarondakoari bide emanez.
Jaietako agur ofiziala
Udaletxeko balkoitik, Cristina Laborda alkateak hitz goraipagarriak eskaini dizkio omenduari, hiri batek bere jaiak hasteko norbait aukeratzen duenean bere balioak eta miresmena azaleratzen dituela nabarmenduz. Labordak Vergararen alderdi gizatiarra, apaltasuna eta besteen osasuna zaintzeko erakutsitako konpromisoa txalotu ditu. Alkatearen esanetan, Itziarrek bidea irekitzen duten eta erreferente bihurtzen diren emakume ugari ordezkatzen ditu, hiriarekin duen lotura estua inoiz galdu gabe ikerketaren eta zientziaren garrantzia lehen planoan jartzea lortu duelako.
Bere txandan, Itziar Vergarak zientzia eta ikerketa osasungintza publikoaren zutabe gisa defendatu ditu. Bere hitzetan, zientziak ezagutzaren mugak zabaltzea bilatzen du errealitatea ulertu eta hobetzeko, eta osasun-sistema publikoari zein ikerketari esker gizarteak gaixotasun ugariri aurre egitea lortu duela gogorarazi du. Gainera, ikertzaile irundarrak gaineratu du zientziak askeago eta gizatiarrago egiten gaituela, iruzurraren edota berritsukeriaren aurrean hain kalteberak ez diren gizarte bidezkoagoak eta kritikoagoak eraikitzen laguntzen duelako. Diskurtsoaren ostean, alkateak San Joan sua piztu du plazan jaiak ofizialki abiatzeko, eta herriak animazioz beteriko gau bati eman dio bide Elektrotxaranga Burrunbarekin, Bele eta Wonka eta Waje 4LEB taldeen kontzertuekin Urdanibia Plazan, eta Santiagoko Deabruak taldearen Correfoc ikuskizunarekin.
Itziar Vergara Mitxeltorena
Itziar Vergara Mitxeltorena irundarra (1968) ibilbide akademiko eta profesional oso sendo baten jabe da, eta 2022tik Biogipuzkoa Osasun Ikerketarako Institutuko zuzendari zientifikoa da. Bertan, onkologia eta gaixotasun neurologikoak (hala nola AEA, zahartzea edo gaixotasun arraroak) bezalako alorretan lan egiten duten 400 profesional eta dozenaka ikerketa-talde koordinatzen ditu. Lanbidez lehen mailako arretako medikua da, Medikuntzan doktorea Euskal Herriko Unibertsitatean (EHU) eta Osasun Publikoko Masterra du Kaliforniako Unibertsitatean (Berkeley). Bere ikerketa-lerro nagusia zahartzeari lehen mailako arretan heltzea izan da, eta Irunekin duen lotura zientzia-dibulgazioko ekimenen bidez mantentzen du, herritarrei ezagutza gerturatzeko Historia eta Zientzia Zikloa bezalako proiektuetan parte hartuz.
