Gaur, 2025eko azaroaren 28an, 25 urte bete ditu IRUNVIk, Irungo Etxebizitzarako Elkarte Publikoak. 2000. urtean sortu zenetik, Irungo Etxebizitzarako Elkarte Publikoak (IRUNVI) 1.038 etxebizitza eta aparkatzeko 594 toki adjudikatu ditu Irungo familien alde. Urte hauetan guztietan, Irungo Udalak sortu zuen erakunde honek hirigintzako proiektu ugari sustatu ditu eta, horiei esker, 1.200 etxebizitza babestu inguru merkaturatu ditu, eta hiriko etxebizitzen merkatu librearen prezioei eutsi.
Zilarrezko ezteiak ospatzeko, elkartearen egoitzan izan dira Cristina Laborda Irungo alkatea, Jon Ugarte Diziplina Urbanistikoko eta Etxebizitzako ordezkaria eta Idoia Yarza IRUNVIko zuzendaria, Eliza kalean. Haiekin batera, bertan izan dira azken 25 urte hauetan onuradun izan diren pertsonetako batzuk. Zehazki, ordezkari bat egon da IRUNVIk etxebizitzarekin, aparkalekuarekin edo laguntzen tramitazioarekin lotuta egiten dituen zazpi izapideetako bakoitzeko.
Ekitaldian izan dira, beraz, Ignacio Letamendia, Lekaeneko adinekoentzako apartamentu baten esleipenduna; Ricardo Pagola, Palmera-Monteron etxebizitza bat esleitzeko lehen eskariaren aurkezlea; Virginia González, Oñaurreko babes ofizialeko etxebizitza baten bigarren eskualdaketaren eroslea; eta Esteban Ubiria, Pinudiko aparkatzeko toki baten esleipenduna. Zerrenda horri gehitu behar dizkiogu Lyz Nely, 2024ko Alardeko alokairuko babes ofizialeko etxebizitzetako baten esleipenduna; eta Esther Juez, irisgarritasuna hobetzeko dirulaguntza bat jaso zuen urbanizazio baten administratzailea, baita Next Generation EU funtsen laguntza bati esker guztiz birgaitutako urbanizazio batena ere.
Cristina Laborda alkatearen hitzetan, “IRUNVIren urteurren borobil honetan, gauza bat oso argi daukat, eta da etxebizitza dela gure apustu nagusietako bat, Udal gisa”. Hogeita bost urte hauetan, Irungo mila familiaren baino gehiagoren bizitza hobetu dela gogoratu du alkateak, baina azpimarratu du ezin direla hor geratu. “Horregatik, hain zuzen ere, datozen hiru urteetan, beste mila familiak ere jasoko dute onura hori, aurki San Migel-Anakan, Mendipen eta Txenperenean eraikitzen hastekoak diren etxebizitzak adjudikatzen direnean”. Cristina Labordak erantsi duenez, etxebizitza publikoko eskaintza horri esker, familia askok aukera izango dute, eskatu dieten moduan, beren bizi-proiektua beren hiritik alde egin gabe garatzeko.
Gainera, alkateak Oñaurreko garapen osoak hiriarentzat nolako mugarria izan zen gogoratu du. “Erronka handi horrek zailtasun mota guztiak gainditu behar izan zituen une ekonomiko zail batean, eta Udal honek apustu handia egin zuen, bide sarbide berrituak eta irisgarriak izango zituen auzo guztiz berri bat sortzea ekarri baitzuen”, gaineratu du Irungo alkateak.
80.000 kontsulta inguru
IRUNVIk herritarrei arreta emateko zerbitzu bat du 2003tik, baina azken 18 urteetako erregistroak baino ez dauzkagu eskura (2025eko datuak oraindik ez dira argitaratu). Informazio horien arabera, 79.409 pertsonari eman die arreta erakundeak. Hortaz, argi geratzen da etxebizitza dela familien ardura nagusietako bat, eta herritarrek udal-erakunde honetan jartzen dutela konfiantza izapide horiek egiteko edo zalantzak argitzeko orduan.
Irunek babes ofizialeko etxebizitza-eskatzaileen erregistro propioa dauka. Egun, 4.336 pertsona daude izena emanda, beren bizi-proiektua babes ofizialeko etxebizitza batean gauzatzeko zain. Eskari horri guztiari aurre egiteko, IRUNVIk zenbait lurzoru eta higiezinen garapena kudeatzen du. Bakoitza dagokion izapidetze fasean dago, eta datozen hiru urteetan babes publikoko 1.000 etxebizitza eraikitzen hasteko aukera emango dute, hiriko puntu askotan: San Migel-Anaka, Mendipe, Korrokoitz eta Lastaola eremuetan eta Larreaundi, Emigrazioa eta Lucas de Berroa 18.eko eraikinetan.
Izatez, aipatzekoa da San Migel-Anaka eta Mendipeko etxebizitzak 2026an hasiko direla eraikitzen. Gainera, horiekin batera eta helburu berarekin, IRUNVI Txenpereneko urbanizazio-proiektua izapidetzen ari da. Horri esker, 667 etxebizitza babestu sustatuko dira datozen urteotan.
Jon Ugarte Etxebizitzako ordezkariak nabarmendu duenez, «etxebizitza publikoa eta aparkatzeko tokiak sustatzeaz gain, IRUNVI elkarlanean aritzen da Eusko Jaurlaritzarekin etxebizitzak birgaitzeko Europako funtsen kudeaketarako. Etxebizitzako ordezkariak azaldu duenez, azken lau urteetan 7.200.000 euroko laguntzak kudeatu ditu, udalerriko 639 etxebizitzaren birgaitzera bideratu direnak. Horrela, ekarpen handia egin du bertan bizi diren familien bizi-kalitatea hobetzeko lanean».
IRUNVI
Irungo Etxebizitzarako Sozietate Publikoa (IRUNVI) 2000ko azaroaren 28an sortu zen, hiriko etxebizitza publikoa sustatzeko, batik bat babes ofizialeko etxebizitzak (BOE). IRUNVIk babes publikoko etxebizitza-eskatzaileen erregistro propioa dauka hasieratik, eta zuzenean esleitu dizkie babes publikoko etxebizitzak Irungo herritarrei. Horretarako, Udalak etxebizitza horiek albait azkarren eraikitzeko aukera ematen zion egitura batez hornitu zuen, eta erakundearen helburua da lurzoruak erostea, hirigintzako kudeaketa egitea eta etxebizitza babestuen eraikuntza sustatzea.
Mende laurden honetan zehar, Udalak funtzio gehiago esleitu dizkio IRUNVIri, eta sozietatea sendotu egin da etxebizitzaren alorreko eragile gisa. Horrela, etxebizitza publikoaren eta aparkalekuen kudeatzaile bihurtu da.
Azken urteetan sozietateak irisgarritasuna errazteko laguntzen eta emantzipaziorako laguntzen espedienteak izapidetu ditu, baita eraikinen ikuskaritza teknikoak ere, eta Eusko Jaurlaritzaren erakunde laguntzaile izendatu dute, Europako funtsekin etxebizitzak eta eraikinak birgaitzeko laguntzak kudeatzeko.
Egun, zazpi langile dauzka Eliza kaleko bulegoan. Astelehenetik ostiralera dago irekita, 8:30etatik 14:30etara goizeko ordutegian eta, astearte eta ostegunetan, baita arratsaldean ere, 15:00etatik 17:00etara.
