Eskola Feministaren udaberriko programazioa aurkeztu dute gaur. Guztira, 3 tailer eta ikastaro bat eskainiko dira. Gaur goizean Irungo Emakumeen Etxean egindako prentsaurrekoan Maite Cortina Berdintasuneko eta LGTBIQ+ Eskubideetako ordezkariak eman ditu programazioaren xehetasunak, Maribel Castello, Olga Rivas eta Ana Zapatero Irungo Emakumeen Etxea Elkarteko ordezkariekin.
Maite Cortina ordezkariak adierazi duenez, “Eskola Feministaren eskaintza zabaltzen jarraitzen dugu, oraingoan udaberriko programa osoarekin”. Programa honek eguneroko gai sentikorrez baina herritarrentzat beharrezkoak diren gaiez hitz egiteko aukera emango duela aurreratu du. Esaterako, aroztegiari eta komunikazio-trebetasunei buruz ikasiko dugu, indarkeria motaren bat pairatzen duten edo jasan duten adineko emakumeen eragina ikertuko dugu eta tailer bat egingo dugu gizonezkoentzat bakarrik, haiek ere gizarte berdinago bat lortzeko borroka horren parte baitira. “Pertsona guztiak animatzen ditut ikastaro eta tailer hauetan izena ematera eta hain beharrezkoak diren jarduera hauetan parte hartzera”, erantsi du ordezkariak.
Irungo Emakumeen Etxea Elkarteak, berriz, elkarren artean kudeatzeko Hitzarmena nabarmendu du, “helburu partekatuetan lanean jarraitzeko aukera ematen baitu. Udaberriko Eskola Feminista garatzeko aukera ematen du, urteko lehen seihileko honetako eskaintza osatzeko, bat egiten baitu hilean ostiral batean antolatzen ari diren Elkarrizketa Feministekin eta baita amaitu berri den Zinema Feminista Zikloarekin ere, zeina oso arrakastatsua izan den”. Elkartetik gaineratu dutenez, “udazkenean aurkeztuko diren proposamenekin batera, programa oso eta anitz bat lortzen ari dira, Irungo emakume guztiei euren bizitza berdintasunean eta askatasunean garatzeko babesa eta ingurunea eskaintze aldera”.
Jarduera egitaraua
Datozen hilabeteetarako egitaraua hiru tailerrek eta ikastaro batek osatuko dute. Zehazki, zurgintzari eta altzari-muntaketari buruzkoa izango da ikastaroa, emakumeek etxeko lan txikiak egiten ikas dezaten, eta baita esku-erreminta eta elektroeramangarri ohikoenak erabiltzen jakiteko ere. Oinarrizko akaberak pastekin, bernizekin, argizariekin eta olioekin, besteak beste, egiten ere irakatsiko dute, eta altzari sinpleak muntatu eta instalatzen ikasteko denbora ere eskainiko da. Zortzi saio izango dira, Markel Zubeldiak eskainiak, eta astearteetan egingo dira, maiatzaren 6tik ekainaren 24ra bitartean, 10:00etatik 12:30era, Lanbide Heziketako Bidasoa Institutuan.
Emakumeen Etxean egingo diren hiru tailer trinkoei dagokienez, lehenengoa ‘Adineko emakumeen aurkako indarkeria‘ izango da. Begirada zabaltzeko pentsatua dago, baita hobeto ulertzeko ere indarkeria matxista ezberdinak eta nola eragiten dieten emakumeei bizitzako etapa horretan. Hiru saio izango dira, maiatzaren 8an, 15ean eta 29an, ostegunetan, 10:00etatik 12:00etara, eta Pepa Bojó gaian adituak egingo ditu.
Bestalde, maiatzaren 22an eta ekainaren 5ean eta 19an (ostegunak), 16:30etik 19:30era, Ana Eguiazabalek ‘Komunikazio-trebetasunak: jendaurrean hitz egitea eta partekatzea’ tailerra emango du. Tailerra, bereziki, komunikazio-ahalmenaz jabetu eta gaitasun hori garatu nahi duten emakumeentzako da.
Azkenik, eta gero eta indar handiagoa hartzen ari den ildo estrategikoari jarraiki, Mikel Otxotorenak bi saioko tailer bat egingo du, gizonezkoei soilik zuzendua, ‘Maskulinitateak’ gaiari buruz. Maiatzaren 27an eta ekainaren 3an izango da, asteartez, 17:30etik 20:30era. Desberdintasun sozialei buruzko hausnarketa sustatzera bideratuta egongo da, eta, zehazki, gizonekin maskulinitateen eraikuntza sozialaren gaia lantzera. Helburua da urratsak egiten jarraitzea gizarte berdinago eta ekitatiboago baterantz.
Jardueretan parte hartzeko izena emateko epea apirilaren 11ra arte egongo da zabalik. Irungo Udalaren web orriaren bitartez egin beharko da. Emakumeen Etxean bertan ere eman ahal izango da izena. Kontziliazioari laguntzeko eta aldez aurretik eskatuta, haurtzaindegi zerbitzua eskainiko da 4 eta 12 urte bitarteko adingabeentzat.
Eskainitako plaza-kopurua baino eskaera gehiago baldin badago, zozketa egingo da jarduera bakoitzean dauden plazak esleitzeko. Horretan, ez dira sartuko Irunen erroldatuta ez dauden pertsonak. Zozketa publikoa izango da apirilaren 28an, 10:00etan, Emakumeen Etxean. Izen-ematea itxi eta zozketa egin ondoren, izena eman duten pertsona guztiei posta elektronikoaren bidez jakinaraziko zaie plaza duten edo ez.
Jarduera hasi baino astebete lehenago eskaerak ez badira iristen eskainitako plazen gutxieneko kopurura, bertan behera geratuko da ikastaroa/tailerra.
‘Partekatu, eraldatu, jarraitu…’ topaketa taldea
Eskola Feminista alde batera utzita, Irungo Udala eta Irungo Emakumeen Etxea Elkartea azarotik ari da antolatzen ‘Partekatu, eraldatu, jarraitu…’ topaketa-taldea, zeina datorren maiatzera arte luzatuko den.
Talde hori hausnarketarako gune segurua eta diskretua da, epairik gabekoa, eta bertan, emakumeei laguntza eskaintzen zaie, euren ongizate integrala berreskura dezaten. Talde horretan, genero-indarkeriaren ondorioek emakumeei nola eragin diezaiekeen aztertzen dugu. Indarkeria horren atzean dauden zergatiak ulertzeko baliabideak eskaintzen dira, emakumeen identitatea indartzen da eta gizartean duten ahotsa eta lekua berreskuratzen laguntzen zaie.
Asteazkenetan izaten dira saio horiek, bi taldetan banatuta: goizekoa 10:00etatik 11:00etara izaten da, eta arratsaldekoa, 18:30etik 19:30era. Taldera joateko, Emakumeen Etxearekin harremanetan jarri behar da zuzenean, ohiko bideetatik (aurrez aurre, telefonoz edo posta elektronikoz).
Emakumeen Etxea, Katea auzoan
Irungo Udalaren eta Irungo Emakumeen Etxea Elkartearen baterako kudeaketa-hitzarmenaren barruan egiten den ‘Emakumeen Etxea Irungo Auzoetan‘ jarduerarekin jarraituz, Kateako Auzo Elkartea izango da hurrengo hitzorduaren agertokia. Apirilaren 11n, ostiralarekin, egingo da, 18:30ean.
Jarduera hori jende ororentzako da, eta elebitan egiten da, gaztelaniaz eta euskaraz, eta asmoa da ezagutaraztea Irungo Emakumeen Etxea zer den eta Udalaren ekipamendu horrek herritarren eskura zer jarduera eta zerbitzu jartzen dituen. Jarduera horretan, Ana Eguiazabalek bakarrizketa bat egingo du klown modura, eta, ondoren, bertaratuek Irungo Emakumeen Etxearen inguruko era guztietako gaiak argitu eta hobetzeko proposamenak egin ahal izango dituzte, gune ezagunagoa, irisgarriagoa eta erakargarriagoa izan dadin herritarrentzat.
Alde Zaharra bisitatu ondoren, jarduera hori beste auzo batzuetatik ere igaroko da 2025. urtean: Behobian maiatzaren 9an eta hiriaren erdialdea irailaren 19an izango dira ‘Emakumeen Etxea Irungo Auzoetan’ ekimenaren hurrengo geltokiak.
