Gipuzkoako Foru Aldundiko Jasangarritasun Departamentuak eta Naturklima Klima Aldaketaren Fundazioak BateraLabs prozesua abiatu dute Bidasoa eskualdean, Irunen egindako lehen saio baten bidez. Parte-hartze foro berri honen helburua klima-aldaketaren aurrean herritarren entzutea, deliberazioa eta ekintza sustatzea da. Prozesua Gipuzkoako hamaika eskualdeetan garatuko da, udalekin eta garapen-agentziekin lankidetzan, tokian tokiko beharretatik abiatuta trantsizio ekologikoa guztion artean eraikitzeko asmoz.
Lehen topaketa honetan hogeita hamar eragile inguruk parte hartu dute, eskualdeko aniztasun sozial, instituzional eta komunitarioa islatuz. Bertan izan dira, besteak beste, Irun eta Hondarribiko udalak, Bidasoa Bizirik, Bidasoa-Txingudi mugaz gaindiko partzuergoa, eta hainbat elkarte garrantzitsu, hala nola Gurutze Gorria, Nagusilan, ACUBI, Balazta, Ficoba edota eskualdeko kirol klub nagusiak. José Ignacio Asensio Jasangarritasuneko diputatuak azpimarratu du BateraLabs ez dela mahai tekniko huts bat, baizik eta herritarrek hasieratik erronkak identifikatzeko eta konponbideak proposatzeko gune ireki eta benetako bat.
Bidasoako errealitate klimatikoa aztergai
Lan-saioan Bidasoako errealitate klimatiko espezifikoa aztertu da, eskualdeak kalteberatasun handia baitu zenbait eremutan, bereziki Txingudi-Bidasoa, Jaizkibel eta Aiako Harrian. Identifikatutako arrisku nagusien artean daude euri-jasen ondoriozko eraikinen kalteak eta kostaldeko uholde-arriskua Irun eta Hondarribiko hiriguneetan. Gainera, azpiegitura kritikoetan (aireportuan edo GI-636 errepidean) izan ditzaketen inpaktuak eta tenperaturen igoerak lehen sektorean —abeltzaintzan eta baso-sektorean— eragingo dituen ondorioak kezkagai gisa agertu dira.
Dinamika parte-hartzaile baten bidez, bertaratutakoek lurraldearen “irakurketa” bat egin dute, muturreko beroarekin, mugikortasunarekin, osasunarekin eta natura-ingurunearen babesarekin lotutako gaiak lehenetsiz. Mapaketa kolektibo honek balio izan du eguneroko esperientziatik abiatuta lehentasunezko erronkak markatzeko. Prozesu honen bidez, Jasangarritasun Departamentuak konpromisoa hartu du eskualde bakoitzean gutxienez proiektu zehatz bat bultzatzeko, herritarrek beraiek identifikatutako premia horietatik abiatuta.
BateraLabs prozesuak udazkenean jarraituko du bigarren fase batekin, non eztabaida kolektiboa eta proposamen zehatzen formulazioa landuko diren. Behin neurri bideragarriak definituta, ekimen horiek herritarren ekintza klimatikoen paper-zorro baten parte izango dira. Dokumentu hori inplikatutako erakunde guztiei helaraziko zaie, proposamenak jarduketa erreal bihur daitezen, eskualdeko trantsizio ekologikoa modu bidezkoagoan eta eraginkorragoan egiteko.
