Txanaleta plazan kokatutako Isuri Gutxiko Eremuari (IGE) buruzko informazio gune espezifikoak 127 kontsulta erregistratu ditu herritarrei ateak ireki dizkien lehen hilabetean. Irungo Udalak bultzatutako espazio honen helburu nagusia etorkizuneko perimetroaren ezarpenaren eta hasierako fasean onartutako ordenantzaren inguruan sortutako zalantza zein galderei erantzun gardena ematea da. Jasotako kontsulta ohikoenak eremuaren aplikazio-muga zehatzak ezagutzera, ibilgailu bakoitzaren ingurumen-bereizgarria (etiketa) identifikatzera eta horrek dituen ondorioak argitzera bideratu dira. Horrez gain, herritarrek interes handia erakutsi dute araudia noiz jarriko den indarrean jakiteko, bai eta IGE barruan dauden garajeen egoeraz edo anbulatoriora autoan sartzeko baimenez galdetzeko ere.
Irailaren amaierara arte zabalik
Informazio puntutik igaro diren pertsonen profilariei dagokienez, 36 eta 65 urte bitarteko herritarrak izan dira interes handiena erakutsi dutenak, kontsulten % 53,5 ordezkatuz; ondoren, 65 urtetik gorako pertsonak kokatu dira (% 40). Generoaren arabera, erabiltzaileen % 66 gizonak izan dira eta % 34 emakumeak. Jatorriari dagokionez, gehienak irundarrak dira (% 75), nahiz eta % 16,5ek nahiago izan duen jatorria ez zehaztu. Bulego honek irailaren amaierara arte jarraituko du zabalik, astelehenetik ostiralera 09:00etatik 13:00etara, eta asteazken zein ostiraletan arratsaldez ere bai, 17:00etatik 19:00etara.
Azkenik, gogorarazi behar da maiatzeko Osoko Bilkuran behin-behinez onartutako ordenantzak jendaurreko informazio-aldian jarraitzen duela. Izapidetze administratiboaren fase hau ezinbestekoa da prozesuaren gardentasuna bermatzeko, eta herritarrei, enpresei nahiz elkarteei aukera ematen die dokumentazioa aztertzeko zein alegazioak, iradokizunak edo erreklamazioak aurkezteko. Epea abuztuaren 6ra arte (egun hori barne) egongo da zabalik, Herritarrentzako Arreta Zerbitzuaren (HAZ) edo egoitza elektronikoaren bidez.
