Irungo Udalak, Udaltzaingoaren bidez, jakinarazi du trafiko-mozketak eta Irunbus hiri-autobus zerbitzuan aldaketak egongo direla asteburu honetan, abuztuaren 7tik 9ra bitartean, Euskal Jiraren ospakizunak direla eta. Jai giroko ekitaldiek, herri-kirol txapelketek zein desfile nagusiak eragina izango dute hiriko hainbat kale eta ibilbide nagusitan, eta Udaltzaingoak babes- zein segurtasun-neurri bereziak hartuko ditu.
Ostiraleko erraldoiak eta igandeko herri kirolak
Abuztuaren 7an, ostirala, Erraldoien eta Buruhandien desfileak trafiko-etenaldiak eragingo ditu 17:40tik 20:00etara bitartean. Denbora-tarte horretan, Urdanibia plaza, Salis etorbidea eta Juncal, Santiago, Eskolak, Fermin Calbeton, Foruak, Nagusia zein San Martzial kaleak kaltetuta egongo dira, eta noizbehinkako mozketa puntualak egingo dira Colón pasealekuan nahiz Urdanibia plazan.
Abuztuaren 9an, igandea, Gipuzkoako Herri Kirolak Pentatloi Txapelketa dela eta, Urdanibia plazako perimetroa itxita egongo da 09:00etatik 14:30era. Korrokoitz kaleko trafikoa Uranzu kalerantz desbideratuko da, eta Santa Elena kaletik datorren zirkulazioa Vega de Eguzkizako kalera bideratuko da. Azken kale honetako erreia ere itxita egongo da noranzko horretan, antolakuntzako ibilgailuek aparkatu ahal izan dezaten. Egun horretan, Irunbusen San Juan Langile eta Urdanibiako geltokiak bertan behera geratuko dira 09:00etatik 14:30era bitartean.
Larunbateko Euskal Jira eta erdiguneko mozketak
Euskal Jiraren egun handian, abuztuaren 8an (larunbata), neurri zorrotzenak ezarriko dira. Goizeko 10:00etatik aurrera ezingo da Urdanibia plazara sartu alboko bideetatik, eta Larreaundi auzorako sarbidea Euskal Herria etorbidetik bakarrik egin ahal izango da. Desfile nagusiari dagokionez, 09:30etik aurrera Gibeanakako biribilgunetik Zubimuxuko biribilgunerako sarbidea itxiko da, eta 10:50etik aurrera Hondarribia kalea, Colon pasealeku osoa eta Gipuzkoa hiribidea moztuko dira (11:00etatik aurrera bi noranzkoetan). Murrizketa guztiak desfileak aurrera egin ahala altxatuko dira, 13:45 ingururako egoera normalizatzea aurreikusten delarik.
Gainera, Txanaleta plazako behin-behineko autobus geltokia zerbitzurik gabe egongo da 10:50etik 13:00ak arte gutxi gorabehera. Colon pasealekuko aparkalekura sartzeko Gipuzkoa etorbidea erabili beharko da, eta Jose Ramon Agirretxeko taxien geltokia aldatu egingo da, Luis Mariano, Joaquin Gamon eta Pikoketa kaleetan kontrako noranzkoan ibilbide bereziak ezarriz. San Juan eta Mendibileko aparkalekuek ohiko funtzionamendua mantenduko dute.
Irunbus lineen aldaketak
Larunbat goizean, 10:45etik 13:00era bitartean, Euskal Jirak eragin zuzena izango du Irunbusen zerbitzuetan. L1ean (Zaisa – Ospitalea), bi noranzkoetan GI-636 saihesbidea erabiliko dute autobusek, Oxinbiribil zein Zubimuxuko biribilguneetatik ohiko ibilbidea berreskuratuz. L2an (San Juan – Katea) Fermin Calbetóneko goiburua Sindikalaren aurreko geltokira eramango da (Elizatxo, 10). L3an (San Juan – Artia) ez du inolako aldaketarik izango eta ohiko zerbitzua emango du. L4an (San Juan – Anzaran – Olaberria) Fermin Calbetoneko goiburua Olibondoen biribilgunera (Elizatxo, 11) mugituko da, eta Anzaran auzoko zerbitzua bertan behera geratuko da ordu-tarte horretan.
