Irungo Udalak eta Hezten enpresak “Haurrak Parkean” egitasmoaren maiatzeko eskaintza jarri dute martxan, haurren aisia eremuan euskararen erabilera indartzeko helburuarekin. Jolas dinamizatzaileak hiriko hainbat parke eta plazatan egingo dira hilabeteko asteazken eta ostiraletan, adinaren arabera bereizitako saioak eskainiz. Josu Iguiñizek, Irungo Euskara ordezkariak, nabarmendu du egitasmo honek, ondo pasatzeaz gain, familiako hizkuntza-ohituretan aldaketa positiboak eragiten dituela.
Asteazkenetako saioak maiatzaren 6an, 13an, 20an eta 27an burutuko dira Nagore Laffage parkean eta Olaketa kaleko Partxis parkean. Eguraldi txarra eginez gero, dinamizatzaileak Toki Alai ikastetxeko patio estalira eta Partxis parkeko aterpera lekualdatuko dira hurrenez hurren. Ostiraletako hitzorduak, berriz, maiatzaren 8an, 15ean, 22an eta 29an izango dira Sargia eta Oñaurreko parkeetan. Euria eginez gero, ekintzak Sargiako frontoi txikian eta Oñaurreko aterpean egingo dituzte.
Bi txandatan
Egun bakoitzean bi txanda ezberdin antolatuko dira haurren adin-tartearen arabera. Lehenengo saioa, “Zabu Zibu” izenekoa, 17:00etatik 18:00etara izango da 3 eta 5 urte bitarteko haurrak dituzten familientzat, eta ezinbestekoa da heldu batek parte hartzea euskarazko jolas tresnak jasotzeko. Bigarren txanda, “Txirrintxon” deitutakoa, 18:00etatik 19:00etara garatuko da 6 eta 9 urte bitarteko haurrentzat. Aurreko edizioetako datuek egitasmoaren harrera ona berresten dute, martxoko eta urriko txandetan 400 lagun inguruk parte hartu baitzuten.
