Asteburu honetan, apirilaren 6an eta 7an, Jaizubia Zaldiketa Eskolan entrenamendu-lehiaketa bat jokatuko da. Irungo klubeko zaldizkoak eta amazonak II. Anagan Kopako 2. faseari aurre egiteko presta daitezen. Lehiaketa hori 3* kategoriako lehiaketa izango da, eta apirilaren 13-14an egingo da Zizur Hipika Klubean.
Entrenamendu-lehiaketa JZEko pista handian egingo da. Probak 9: 00etatik aurrera hasiko dira, eta altuera txikienetik handienera egingo dira, 0,50 m-ko probatik hasita; ondoren, 0,65 m, 0,95 m, 1,05 m, 1,15 m, eta, azkenik, altuera handieneko proba, 1,25 m. Gipuzkoako, Nafarroako eta Iparraldeko zaldizko eta amazonek parte hartuko dute bi jardunaldi horietan.
Asteburu erabakigarria da Zizur Hipika Klubaren instalazioetan egingo den Anagan Kopako hurrengo faseari aurre egiteko binomioak ongi prestatu daitezen. Ehun irteera baino gehiago izango dira asteburu guztian, eta Jaizubia Zaldiketa Eskolara hurbiltzen direnek oztopo-jauziaren diziplinak eskaintzen duen ikusgarritasunaz gozatu ahal izango dute.
Euskadiko Hipika Federazioak antolatutako Anagan Kopa 3* kategoriako jauzi autonomikoen lau lehiaketako zirkuitua da. Lehiaketa horiek urtarriletik ekainera bitartean jokatzen dira, lau kluben laguntzarekin, tartean, Jaizubia Zaldiketa Eskola.
