Irungo Udaleko Kultura zerbitzuak jakinarazi du Oiasso Museoak bat egingo duela 2026ko Museoen Nazioarteko Egunarekin bere hogeigarren urteurrena ospatzeko. Arkeologia, oroitzapena eta gizarte-ekintza uztartzen dituen programazio berezia prestatu dute horretarako, museoaren 20. urteurrena herritar guztiei irekitako hainbat jarduerarekin oroituko duena. Gainera, maiatzaren 16an, Oiasso Museorako sarrera doakoa izango da.
Programazio berezi honen barruan, herritarrek aukera anitz izango dituzte kulturaz gozatzeko. Hasteko, maiatzaren 16an, larunbata, Oiasso Museora sartzea erabat doakoa izango da guztientzat, eta erakusketa iraunkorra bisitatu ahal izango da. Egun horretan bertan, Errealitate Birtualeko betaurrekoen laguntzarekin Oiassoko terma erromatarrak ezagutzeko bisita gidatuak antolatu dira; zehazki, gaztelaniazko saioa 11:00etan izango da eta euskarazkoa, berriz, 12:30ean. Sarrerak museoaren webgune ofizialaren bitartez edota bertako leihatilan erosi ahal izango dira ohiko moduan. Hurrengo egunean, maiatzaren 17an, igande goizez, Tren Txikitoan Santa Elena Ermitarako ibilbide berezi bat egiteko aukera ere eskainiko da.
Urteurreneko ospakizunekin loturik, maiatzaren 19an, asteartea, arratsaldeko 19:00etan hitzaldi berezi bat eskainiko da museoan bertan. Solasaldia Mertxe Urteagak emango du, hau da, Oiassoko aurkikuntza nagusien arkeologo arduradunak eta museoaren beraren sortzaile zein zuzendaria izan zenak. Hitzaldi horrek “De aspiración a realidad: desafíos, retos y aprendizaje en el proceso de gestación del museo Oiasso de Irun, 1996-2006” izenburua izango du, eta bertaratu nahi dutenentzat sarrera librea izango da aretoko edukiera bete arte. Modu honetan, Irunek hiri mailako historiaren zati garrantzitsu bat errepasatuko du komunitate osoari irekitako kultur eskaintza honen bitartez.
Lankidetza-hitzarmena Elkarrekin kooperatibarekin
“Museoak mundu zatitua batzen” lelopean, erakundeak lankidetza-hitzarmen bat sinatu du Elkarrekin kooperatibarekin komunitateen arteko gizarte-kohesioa sustatzeko asmoz. Akordio horren bitartez, “Ongi Etorri Eskolara” proiektuko Familia Laguna programan parte hartzen duten jatorri desberdineko familiek museoko jardueretara eta larunbatetako ARKEOLAB tailer familiarretara sartzeko aukera izango dute. Ekimen honek familia migratzaileen eta antzeko adinetako seme-alabak dituzten tokiko familien arteko loturak estutzea bilatzen du, betiere kulturaren bidezko gizarteratze prozesuak erraztuz.
