Ostiral honetan, irailaren 5ean, Irungo Udalak ekitaldi instituzionala egingo du 1936an tropa kolpistek hiria okupatu zuteneko 89. urteurrena oroitzeko. Hitzordua eguerdiko 12:00etan izango da San Juan plazan. Bertan izango dira Cristina Laborda alkatea buru, Gorka Alvarez Giza Eskubide, Memoria Demokratiko eta Lankidetzaren ordezkaria. Gainera, Udal talde politiko guztiak deituak daude bertan parte hartzeko, Irungo Errepublikarren Nicolas Guerendiain Elkarteko eta Kepa Ordoki Elkarteko ordezkariez gain.
Herritarrak gonbidatuta daude memoria-ekitaldi honetan parte hartzera. Bertan, hiriak maila guztietan jasan zituen gertaera tragikoak gogoratuko dira. Ekitaldia minutu bateko isilunea eta lore-eskaintzak osatuko dute, egun osoan zehar udaletxeko fatxadaren aurrean egongo den gunean, nahi duenak bertara hurbildu eta bere omenaldia egin dezan.
Irun Gerra Zibilean
Ekitaldiak Gerra Zibilean Irunek izan zuen paper estrategikoa gogorarazi nahi du, mugako kokalekuagatik eta Europako demokraziekin zuen loturagatik. Erresistentziak 45 egun iraun zuen, lehorrez, itsasoz eta airez egindako borroka gogorrekin, suntsitutako hiri bat atzean utziz, eta suntsiketa hori larriagotu egin zen gatazkaren azken egunetan eragindako sutearekin.
Gertaera haien ondorioek sakonki markatu zuten milaka irundarren bizitza. Familia askok Bidasoaz bestaldera edo barnealdera ihes egin behar izan zuten, batzuk aste batzuk geroago itzuli ziren, beste batzuk urteetan erbestean egon ziren, eta baita betiko ere. Izan ziren gerra amaitu arte borrokan jarraitu eta Bigarren Mundu Gerran parte hartu zutenak ere, Europan totalitarismoaren porrotak diktaduraren amaiera ekarriko zuela sinetsita.
Ekitaldi horren bidez, Irungo Udalak berretsi egiten du egiaren, justiziaren, erreparazioaren eta ez errepikatzeko bermearen printzipioekin duen konpromisoa, bai eta memoria demokratikoaren defentsarekin ere, egungo eta etorkizuneko belaunaldientzako konkordia, bizikidetza eta aniztasun politikoko balioen ondare gisa.
Publikoari irekitako jarduerak
Giza Eskubideen, Memoria Demokratikoaren eta Lankidetzaren arloak gogorarazi du, gainera, programa osagarri bat antolatu duela aste hauetan zehar. Aurreikusitako jardueren artean, Palmera Montero zentro zibikoan hainbat hitzaldi daude, guztiak 19:00etan: gaur, irailak 3, Koldo San Sebastianek ‘Irun, garai nahasietan bidegurutzea’ eskainiko du; irailaren 4an, Jon Hernandezek eta Miguel Usabiagak ‘Irungo defentsaz’ hitz egingo dute; eta irailaren 9an, Peli Lekuonak ‘Irundarrak Erorien Haranean’ aurkeztuko du.
Era berean, irailaren 7ra arte, Antxeta Irratiak “Erbesteratutako pertsonen oroimenaren zubia” izenburupean antolatutako erakusketa egongo da ikusgai Zubi Etorbidean. Erakusketak erbestean izandako bizipenei buruzko argazkiak eta podcastak biltzen ditu, baita enklabe horren inguruko hainbat hamarkadatako elkartasunari buruzkoak ere.
