Irun eta Hondarribiko Udalek, Bidasoa biziriken bitartez, Lantalde Industriala osatzen duten enpresentzako topaketa-zikloak inauguratu dituzte, sektorearen berehalako erronkei erantzuteko helburuz. Zikloak bi ildo nagusitan antolatu dira: prozesu industrialetan Adimen Artifizialaren (AA) aplikazioa; eta talentuaren kudeaketa eta atxikipena. Ziklo bakoitzak hiru saio izango ditu.
Atzokoak, irailaren 23ko saioak, Adimen Artifizialari eskainitako zikloa ireki du; saioa AAren bidezko plangintza eta enpresa-kudeaketari eskaini zaio, teknologia honek prozesuak nola optimizatu ditzakeen eta erabaki estrategikoak hartzea nola hobetu dezakeen aztertuz. Bigarren zikloa, urriaren 16an hasiko dena, lehen saioan balio-proposamenen eta enplegatzaile-markaren eraikuntza jorratuko du, lehiakortasun handiko ingurunean profesionalak erakartzeko eta atxikitzeko funtsezko alderdia. Saio bakoitzean ikuspegi osagarriak landuko dira, gaia modu osatu eta aurrerakorrean lantzeko.
Nuria Alzagak, Bidasoa bizirikeko lehendakariak, adierazi du: “Topaketa hauek enpresek beraiek adierazitako beharren arabera diseinatu dira. Gure konpromisoa da tresna erabilgarri eta puntakoekin hornitzea, merkatuaren aldaketei aurrea hartzeko eta gero eta zorrotzagoa den testuinguru globalean euren posizioa sendotzeko.”
Bestalde, Estitxu Urtizbereak, Bidasoa bizirikeko lehendakariordeak, nabarmendu du: “Berrikuntza teknologikoa eta talentuaren kudeaketa uztartzea etorkizuneko lehiakortasunaren oinarria da. Saio hauekin, enpresek elkarren artean ikasteko eta elkarrekin aurrera egiteko aukera duten espazioa indartzen jarraitzen dugu”.
Lantalde Industriala: lankidetza estrategikorako gunea
Lantalde Industriala Bidasoa bizirikek 2022an abiarazitako ekimena da, Gipuzkoako Foru Aldundiaren Sustapen Ekonomikoko eta Proiektu Estrategikoetako Departamentuak kofinantzatua. Taldeak gaur egun eskualdeko 20 langiletik gorako hamar enpresa industrial biltzen ditu: Alcad Electronics, Algon Estructuras Metálicas, Conatec, Likale-Cauchopren, Norclamp, Railtek Ingeniería Industrial, Sellex, Válvulas Zubi, Alai Extrusión eta Bianditz.
Sortu zenetik, Lantalde Industrialak bisita teknikoak, jardunaldi tematikoak eta enpresetan egindako topaketak sustatu ditu, praktika onen trukea eta ikaskuntza partekatua erraztuz. Datorren urterako aurreikusitako lan-planak, aipatutako topaketez gain, enpresetan egingo diren topaketak eta intereseko bisitak jasotzen ditu, proiektu errealen kasuak ezagutzeko; hala, Bidasoako ehun industrialean lehiakortasuna eta berrikuntza bultzatzeko erreferentziazko eredutzat sendotzen ari da.
