Dagoeneko zabalik daude Kirolprobak webgunearen bidez Super Amara Bidasoa Atletiko Taldeak (BAT) datozen hilabeteetan antolatuko dituen lasterketetarako izen-emateak. Klubak prestatu duen egutegian hiru hitzordu nagusi nabarmentzen dira: lehenengoa, Irungo Miliak 5K Salto Foundation proba ekainaren lehen igandean izango da; ondoren, San Martzial eta Guadalupeko igoerak iritsiko dira, Carrocerias Euskaldunak babestuak, Irun eta Hondarribiko jaietan girotuta.
X.Irungo Miliak 5K Salto Foundation lasterketan izena emateko epea martxan dago. Ekitaldia igandean, ekainak 7, ospatuko da Irungo erdigunean, publiko guztiarentzat pentsatutako jardunaldi oso batekin. Programak kirola, inklusioa eta konpromiso soziala uztartzen ditu, eta honako probak eskainiko ditu: 5 kilometroko zirkuitu homologatua, milia herrikoi eta egokituak, haurrentzako lasterketak eta martxa solidarioa. Online izen-emateak ekainaren 5era arte egin daitezke, baina probaren egunean bertan ere egongo da aukera. Gainera, bildutako diruaren zati bat Minbiziaren Aurkako Gipuzkoako Elkartearentzat izango da, atletismoaz gozatzeko giro osasungarri eta solidarioa bermatuz.
Ekainaren amaieran, Irungo San Pedro eta San Martzial jaiak direla eta, Carrocerías Euskalduna XLVIII. San Martzial Igoera ospatuko da. Proba 2026ko ekainaren 27an (larunbata) izango da, goizeko 10:30ean. Lasterketa Urdanibia plazatik irtengo da eta San Martzial ermitan amaituko da, 3,6 kilometroko ibilbide zorrotz baten ondoren. Gizonen eta emakumeen kategoria absolutuak izango ditu eta bakoitzeko lehen bost sailkatuak sarituko dira. Online izen-ematea 12 euroan egongo da eskuragarri ekainaren 26ko 13:00ak arte; egun berean irteera-gunean izena emanez gero, berriz, prezioa 16 eurokoa izango da.
Irailera begira, Hondarribiko jaiekin batera, egutegi herrikoiaren beste klasiko bat itzuliko da: Carrocerías Euskalduna XLVIII. Guadalupeko Igoera. Super Amara BATek Hondarribiko Udalarekin batera antolatutako proba hau 2026ko irailaren 5ean (larunbata) egingo da, 10:30ean. Jostaldi pilotalekuan hasi eta Guadalupeko Santutegian amaituko da, 4,72 kilometroko luzera eta 182 metroko desnibela gainditu ondoren. Kasu honetan ere, lehen bost gizon eta emakume sailkatuak sarituko dira. Online izen-emateak irailaren 4ko 13:00ak arte egin daitezke (12 €) edo lasterketa egunean bertan (16 €). Berrikuntza gisa, Guadalupe Txikia itzuliko da, urtebete ospatu gabe egon ondoren, 1 eta 13 urte bitarteko haurrentzako doako lasterketekin.
Igoera Pack-a
Azkenik, bi igoeretan parte hartu nahi dutenentzat “Igoera Pack-a” promozioa aktibatu du klubak berriz ere. Eskaintza honi esker, San Martzial eta Guadalupeko probetan parte hartu nahi dutenek deskontu garrantzitsua izango dute: bi lasterketak bakoitza bere aldetik ordaindu beharrean (24 €), pack-aren bidez 18 euroan eman dezakete izena. Horrela, korrikalariek 6 euroko aurrezkia lortuko dute bi probetan izena ematean.
