Gaur goizean emandako prentsaurrekoan, Cristina Laborda alkateak, Iñigo Berges Segurtasun ordezkariak, Ismael Alagón Udaltzaingoko ofizialordeak eta Iñigo Echepare larrialdietako teknikariak Irungo Koordinazio Zentro Operatiboaren (KZO) nondik norakoak azaldu dituzte. Udaltzaingoaren komisarian kokatutako zentro hau Aginte Postu nagusia da larrialdi egoeretan edo babes zibileko udal-planak aktibatzen direnean. Sistema honek hirian zeharreko 180 kamera baino gehiago, software berria eta monitore gehigarriak integratzen ditu erantzun eraginkorragoa bermatzeko.
KZOaren helburu nagusia informazioa zentralizatzea eta intzidentzien aurrean erantzuna koordinatzea da. Larrialdietako teknikariaren zuzendaritzapean, diziplina anitzeko lantalde batek hartzen du parte bertan: Udaltzaingoak, Babes Zibilak, Ertzaintzak, Irunbusek, suhiltzaileek, osasun-zerbitzuek eta Udaleko teknikariek.
Laborda alkateak adierazi duenez, helburua herritarrei konfiantza helaraztea da: “Segurtasuna hori ere bada: baliabide guztiek koordinatuta lan egiten dutela bermatzea, bai prebentzioan, bai intzidentzia bat sortzen denean erantzun eraginkorra emateko”.
Hobekuntza teknologikoak
Zentroak jauzi kualitatiboa eman du kudeaketan, NUUK programa eta software berria baliatuz. Tresna horiei esker, hiriko kameren irudiak denbora errealean azter daitezke, eta iturri desberdinak (Euskalmet, Google Maps edo Konfederazio Hidrografikoa) pantaila berean konbinatu daitezke.
Berrikuntza fisiko garrantzitsua ere izan da: lehen zeuden sei monitoreen ordez, orain bederatzi pantaila daude komisarian. Interesgarria da azpimarratzea hobekuntza hau partaidetza bidezko aurrekontuei esker egin dela, herritarrek bozka gehien emandako proposamenetako bat izan baita.
Zaintza-sarea zabaltzen
Gaur egun, sistemak hirian sakabanatutako 180 kamera baino gehiago kudeatzen ditu, eta ekitaldi osoen grabazioak egiteko aukera ematen du (maratoi erdiak, Behobia-San Sebastián, jaiak edo kontzertuak).
Hala ere, sarea handitzen jarraituko du. Udalak 36 kamera berriren hornidura onartu du, orain arte bideozaintzarik ez zuten 18 lekutan jartzeko. Instalazio horiek datozen hilabeteetan egingo dira, eta 2026. urte amaierarako Irunek guztira 226 kamera izango ditu kaleetako segurtasuna indartzeko.
