Irun’go Atsegiña Elkarteak eta Zebra Allboardersek urriaren amaieran iragarri zuten Erraldoien eta Buruhandien Konpartsako erraldoietan inspiratutako produktuen bilduma esklusiboa merkaturatzeko proiektua. Ideia hori errealitate bihurtu da dagoeneko eta, bihartik, abenduaren 13ko 16:30etatik aurrera, Zebra Allboardersen dendan egongo dira salgai
Kalitate handiko materialez diseinatu eta egindako bildumak helduentzako bi kamiseta-modelo eta haurrentzako modelo bat ditu, erraldoien ondarea erakusteko aproposak. Horrez gain, oihalezko poltsak ere baditu, motibo esklusiboekin apainduak, eta katilu pertsonalizatuak, egunerokotasunerako ezin hobeak. Pieza horiek diseinu erakargarriagatik ez ezik, iraunkortasunagatik eta erosotasunagatik ere nabarmentzen dira, familia osoarentzako aukera moldakorrak bihurtuz.
Bilduma modu iraunkorrean egongo da eskuragarri, baina proiektuaren bultzatzaileek adierazi dutenez, “Eguberria aukera paregabea da erosteko, tokiko kulturaren zati bat opari gisa edo harro erakusteko, lerro honek modu moderno eta hurbilean ospatzen baitu erraldoien ondarea”.
Ehun urtetik gorako historia
Mende bat baino gehiagoko historia dute konpartsako erraldoiek, eta hiriko ikur kultural bizia dira. Bilduma honek ondare bakar gisa duen garrantzia aldarrikatu nahi du, tradizioa eta berrikuntza lotuz. “Proiektu hau jaietako pertsonaiak baino askoz gehiago diren pertsonaiak herritarrei hurbiltzeko modu bat da: gure nortasunaren eta historiaren parte dira. Erraldoiak irundarren eguneroko bizitzan egotea nahi dugu, eta guztiontzat harro egoteko arrazoi izatea”, adierazi du Jesús Rubio Pilarte Irun’go Atsegiña elkarteko presidenteak.
Bestalde, Adrián Crowley Carrascok, Zebra Allboarders-eko ordezkariak, ekimen honekiko gogo bizia adierazi du: “Zebra Allboardersetik hunkituta gaude Irun’go Atsegiña elkartea bezalako erakunde enblematiko batekin elkarlanean aritzeagatik. Diseinua, funtzionaltasuna eta gure hirian hain maite dugun kultura-ondare horrekiko errespetua uztartuko dituen bilduma bat sortzeko lan egin dugu. Etorkizuneko lankidetza askoren artean lehenengoa izatea espero dugu”.
Hirian bertan eginak
Proiektu honek Irun’go Atsegiña elkartea, hiriko dekanoa eta kultur erreferentea, Zebra Allboardersekin, moda eta osagarrietan espezializatutako tokiko enpresa nabarmenarekin, elkartzen du. Elkarrekin, erraldoien funtsa errespetatu eta ospatuko duen bilduma bat eskaintzeko lan egin dute, Irungo ondarearen funtsezko zati gisa.
Bilduma abenduaren 13ko 16:30etatik aurrera egongo da eskuragarri, Irungo Fermin Calbetón kaleko 6. zenbakian dagoen Zebra Allboarders dendan.
