Lanean Mugaz Gaindiko Enplegu Azokaren II. edizioak 50 enpresa baino gehiago bilduko ditu Ficoban
Irungo eta Hondarribiko udalek, Bidasoa bizirik agentziaren bidez eta Eurorregioarekin elkarlanean, Lanean Mugaz Gaindiko Enplegu Azokaren bigarren edizioa antolatu dute. Topaketa hau maiatzaren 21ean egingo da Ficoban, eta Gipuzkoa, Nafarroa zein Akitania Berriko 50 enpresa baino gehiago elkartuko ditu. Ekimen hau POCTEFA EFA154/04 proiektuaren baitan kokatzen da.
Jardunaldiaren helburu nagusia enplegu bila dabiltzan pertsonak mugaren bi aldeetan dauden lan-aukeretara hurbiltzea da. Goiz osoan zehar, hautagaiek enpresekin harreman zuzena izateko aukera izango dute, sektore ugaritako eskaintzak eskura izanez: ostalaritza, elikadura, industria eta zerbitzuak, besteak beste. Gainera, Lanbide, Nafarroako Enplegu Zerbitzua eta France Travail bezalako enplegu-zerbitzu publikoek ere parte hartuko dute.
Nuria Alzagak, Bidasoa bizirikeko presidenteak, ekimenaren garrantzia azpimarratu du: “Lanean ekimenarekin urrats erabakigarria ematen dugu hiru lurraldeetako enpresa-sarea enplegu bila dabiltzan pertsonengana hurbiltzeko”. Ildo beretik, Estitxu Urtizberea presidenteordeak gaineratu du azoka hau tresna estrategikoa dela mugaz gaindiko lan-mugikortasuna sustatzeko eta ekosistema eraginkor bat sortzeko.
Laguntza eta zerbitzu praktikoak
Elkarrizketa guneez gain, azokak informazio praktikoa eskainiko du tituluen homologazioari (Bidez bide) eta atzerritartasunari (Adiskidetuak) buruz. Halaber, bertan ordenagailuz eta inprimagailuz hornitutako enplegu-zentro bat egongo da, curriculuma momentuan bertan egokitu eta inprimatu ahal izateko. Aurreko asteetan, Bidasoa bizirikek tailer espezifikoak eta orientazio zerbitzua eskainiko ditu (943 50 96 00) parte-hartzaileak prestatu daitezen.
Leyre Azconak, Akitania Berria Euskadi Nafarroa Eurorregioko zuzendariak, adierazi du proiektu honen xedea benetako mugaz gaindiko enplegu-eremu bat egituratzea dela, erronkei erantzun bateratuak emanez. Proiektu hau POCTEFA programa europarrak finantzatzen du, Espainia eta Frantziaren arteko integrazio ekonomiko eta soziala indartzeko helburuarekin.
Lehen edizioaren arrakasta oinarri
Joan den urrian egindako lehen edizioak datu oso positiboak utzi zituen: 48 enpresak parte hartu zuten eta 400 lanpostu inguru eskaini ziren. Oraingoan, esperientzia duten langileei zein lan bila dabilen edonori zuzendutako deialdi honek arrakasta hori berretsi nahi du.
Azokarako sarrera librea eta doakoa izango da. Lan-eskaintzei buruzko xehetasun guztiak maiatzaren lehen astetik aurrera egongo dira ikusgai www.bidasoa-activa.com webgunean.
