San Pedro eta San Martzial jaiak gero eta gertuago daude, eta horrekin batera, herriko barrakak eta feriak bueltan izango dira Irunen. Irungo Udaleko Kultura arloak jakinarazi duenez, Ficobako kanpoko aparkalekuan kokatuko direla berriro ere barrakak. Era berean, salmenta-postuak Luis Mariano kalean eta txosnak Urdanibia Plazan izango dira. Horiek guztiak asteburu honetatik aurrera martxan izango dira.
Atrakzioak
Atrakzioak ekainaren 13tik uztailaren 2ra arte egongo dira zabalik, biak barne, herritar zein bisitari guztiek jai giroaz eta aisialdiaz gozatu dezaten. Prezioei eta herritarrentzako erraztasunei dagokienez, aurten ere “Egun Herrikoiak” egokituko dira ekainaren 13an, ekainaren 18an eta uztailaren 2an. Egun berezi horietan, atrakzio guztiek 2,50 euroko prezio popularra izango dute bidaia bakoitzeko. Gainerako egunetan, haurrentzako atrakzioen gehienezko prezioa 3,50 eurokoa izango da (sei bidaiako bonua 15 euroan eskuratu ahal izango da), helduen atrakzioena 4,50 eurokoa gehienez ere, eta atrakzio berezi edo berriena 5,50 eurokoa gehienez.
Guztientzat gozagarri
Egitarauaren barruan, Udalak apustu sendoa egin du barraka-gunea herritar guztientzat irisgarria eta erosoa izan dadin. Hori dela eta, ekainaren 17an (17:00etatik 20:00etara bitartean) eta ekainaren 24an zehar zein 25ean (17:00etatik 19:00etara bitartean) ez da musikarik ez soinu karrankaririk izango, atrakzioak ahalik eta inklusiboenak izan daitezen. Gainera, uztailaren 1ean, 22:00etatik 23:00etara bitartean, feriak argirik eta soinurik gabe geratuko dira erabat, herrian programatuta dagoen dronen ikuskizunaren iraupenean ingurunea errespetatzeko.
Ordutegi ofizialari dagokionez, atrakzioak arratsaldeko 17:00etan irekiko dira egun gehienetan, ekainaren 29an (16:30ean irekiko baita) eta ekainaren 30ean zehar zein uztailaren 1ean izan ezik, azken bi egun hauetan eguerdiko txanda ere egongo baita 12:00etatik 14:00etara. Itxierari dagokionez, astegunetan 22:00etan edo 23:00etan itxiko dira ateak, eta jai egun seinalatuetan edo asteburuetan gauerdira arte luzatuko da ordutegia. Ekainaren 28, 29 eta 30eko gauetan, berriz, jaien egun nagusiekin bat eginez, atrakzioak goizaldeko 02:30era arte egongo dira martxan. Arautegi orokor gisa,bizilagunen atsedena errespetatzeko, barraketako musika beti atrakzioak erabat itxi baino ordubete lehenago itzaliko da egunero.
Postuak eta txosnak
Luis Mariano kaleko salmenta-postuak eta Urdanibia Plazako txosnak bihar ostiraletik (ekainak 12) uztailaren 1era arte (biak barne) irekiko dira.
