Euskal Meteorologia Agentziak (Euskalmet), Irungo Udalak eta Udaltzaingoak, Eusko Jaurlaritzako Larrialdiei Aurre Egiteko eta Meteorologiako Zuzendaritzaren bidez, Larrialdietarako Udal Plana aktibatu dute astelehen honetarako, hilak 22, tenperatura altuengatik aurreikusita dagoen muturreko arrisku egoerari aurre egiteko. Babes Zibileko Udal Plana barne-kontroleko orri bat da, herritarrei, udalei eta larrialdi-egoeretan jarduten duten zerbitzuei zuzendutako hainbat jarduera biltzen dituena, eguraldi txarrari aurre egiteko. Euskalmeten egungo iragarpenaren arabera, muturreko tenperatura altuengatiko alerta maximoa goizaldeko 00:12etik arratsaldeko 20:00etara egongo da indarrean, eta ordu tarte horretan tenperatura maximoak batez beste 37ºC-koak izango dira hirian.
Jai egitarauan aldaketa
Muturreko egoera honen ondorioz eta Kantauri isurialdean ezarritako alerta gorriari erantzunez, Irungo Udalak San Pedro eta San Martzial jaietako astelehen honetako egitarauan aldaketa garrantzitsuak egitea erabaki du herritarrak babesteko. Zehazki, hasiera batean Urdanibia plazan egitekoak ziren Kulturarteko jarduerak, antzara jokoa eta kometen fabrikazioa CBA Kultura eta Sormen Zentrora lekualdatuko dira, gune hau hiriko babes klimatikoen sareko parte baita. Bestalde, astelehenerako aurreikusita zeuden haurrentzako jolasak eta Bentak auzoko puzgarriak zein haurrentzako atrakzioak erabat bertan behera geratu dira. Udalak barkamena eskatu du aldaketa hauek sor ditzaketen eragozpenengatik, eta eguraldiaren zein alerten bilakaeraren etengabeko jarraipena egingo duela eta aldaketa guztiak ohiko kanalen bidez garaiz jakinaraziko dituela gaineratu du.
Larrialdi planaren aktibazioa
Ingurunearen segurtasunari eta suteen prebentzioari dagokionez, Udaltzaingoak gogorarazi du guztiz debekatuta egongo dela barbakoak egitea Aiako Harria Parke Naturalean eta landa-eremuko beste edozein atsedenlekutan. Horrez gain, gaur eta bihar egingo duen beroari aurre egiteko Euskalmetek hainbat prebentzio gomendio eman ditu, hala nola ura eta likidoak maiz edanez ongi hidratatzea, entsaladak, gazpatxoa, barazkiak eta frutak bezalako jaki arinak kontsumitzea, eta arropa lasaia, arina eta transpiratzen duena erabiltzea. Ahal dela, bero handiena egiten duen orduetan kalera ez irtetea eta jarduera fisiko bizirik ez egitea gomendatzen da, eta irten behar izanez gero, burua estalita eramatea eta itzala bilatzea. Etxe barruan, gomendagarria da pertsianak jaistea eta leihoak ixtea bero orduetan, gorputza, aurpegia eta eskuak ur freskoarekin hoztea, eta botikak toki freskoan edukitzea.
Biztanleriaren babesari dagokionez, arreta berezia eskaini behar zaie kolektibo zaurgarrienei, hala nola haurrei, adingabeei, adinekoei, haurdun dauden emakumeei, bularreko haurrei eta gaixotasun kronikoak dituzten pertsonei, eta bakarrik bizi diren adineko pertsonak bisitatzea gomendatzen da. Udaltzaingoak azpimarratu du ez dela inoiz pertsona edo animalia bat aparkatuta eta itxita dagoen ibilgailu batean utzi behar, itzalean egon arren. Sintomek ordubete baino gehiago irauten badute eta beroari lotuta badaude, osasun-arreta bilatu eta leku fresko batean egon behar da; norbait konorterik gabe badago eta botaka egiten badu, berriz, burua albo batera makurtu behar zaio arnasbideak libre edukitzeko.
Azkenik, Irungo Udalak herritarrei gogorarazten die hirian zehar banatutako 30 babesleku klimatiko eskuragarri dituztela, eta horien mapa loturan kontsulta daitekeela. Era berean, Udaltzaingoak doako SMS alerta-zerbitzua eskaintzen die herritarrei fenomeno meteorologiko txarrek (euri-jasak, haizeteak, hotz handia, elurteak edo baso-suteak) edo bestelako arriskuek eragindako larrialdiak daudenerako. Alerta larriko egoeretan, abisuak automatikoki bidaliko dira, harpidetzarik egin beharrik gabe, Udal Informazio Sisteman erregistratuta dauden eta arrisku-eremuan erroldatuta dauden pertsonen telefono mugikorretara, baina gainerako herritarrek ere eman dezakete alta zerbitzuan horretarako egokitutako webgunean.
