Irungo Udalak eta Irungo Emakumeen Etxea Elkarteak omenaldi berezia antolatu dute Nagore Laffage irundarra gogoratzeko, haren hilketaren 18. urteurrena betetzen den honetan. Hitzordua datorren uztailaren 7an izango da, asteartearekin, arratsaldeko 19:00etatik aurrera, Istillaga plazan kokatuta dagoen Irungo Emakumeen Etxearen aurreko zabalgunean. Antolatzaileek herritar guztiak deitu dituzte ekitaldi ireki honetan parte hartzera, eta jakinarazi dute euria eginez gero, omenaldia estalita dagoen beste kokapen batera lekualdatuko dela.
Ekitaldi honen bitartez, Nagoreren oroitzapena ia bi hamarkada geroago ere hiriko pertsona askoren oroimenean eta bihotzean erabat bizirik dagoela berretsi nahi da. Irungo Udalak eta Emakumeen Etxeak data esanguratsu hau baliatuko dute emakumeen aurkako indarkeriak gizartean uzten dituen ondorio eta zauri konponezinak ozen salatzeko. Horrez gain, omenaldiak Nagoreren ama den Asun Casasolaren jardun nekaezina jendaurrean aitortzea eta sustatzea du helburu, indarkeria matxista prebenitzeko eta gazteak kontzientziatzeko egiten duen lan izugarria eskertzeko.
Omenaldia arratsaldeko zazpietan hasiko da Emakumeen Etxearen kanpoaldean egingo den harrera instituzional batekin. Ekitaldian Cristina Laborda alkatea eta Maite Cortina Berdintasun eta LGTBIQ+ Eskubideen ordezkaria izango dira udalaren izenean. Protokoloaren ostean, kulturak eta adierazpen artistikoak hartuko dute lekua; alde batetik, Asun Casasola ipuin lehiaketako kontakizunen irakurketa dramatizatua eskainiko da Patxi Perezek gidatuta, eta bestetik, Abesbatza Feministak ‘Ate morea’ abestia interpretatuko du. Azkenik, ekitaldiari amaiera emateko, Asun Casasolak berak hartuko du hitza bertaratutako herritarrei hitzaldi bat eskaintzeko.
