Aurtengo uda bizia igaro ondoren, Irun udazkeneko kultur agendari ekiteko prestatzen ari da. Urriaren eta abenduaren artean, hiriko Udalak 30 jarduera baino gehiago antolatu ditu publiko eta gustu guztiei erantzuteko asmoz. Nuria Alzaga Kulturako ordezkariak aurkeztutako egitarauak etxeko talentua eta kanpoko proposamenak uztartzen ditu, CBAko Kultura eta Sorkuntza Zentroan, Amaia Kultur Zentroan zein Oiasso Museoan eta San Juan plazan banatuko diren ekintzekin.
Urria indartsu hasiko da Amaia KZan, urriaren 2an (19:00etan) “No me toques el cuento” komedia musikala izanda, eta hurrengo egunean Oiasso Museoan X. Jardunaldi Greziarra (17:00etan) zein San Juan plazan Hueccoren kontzertua (22:00etan). Hilabetean zehar, Irun Zuzenean Zikloak musika eskaintza zabala ekarriko du CBA Zentrora (21:00etan): Jimena Amarillo eta Biznaga urriaren 10ean, Pipiolas eta Carlos Sadness urriaren 17an, La Paloma eta La Habitación Roja urriaren 24an, eta Garazi Esnaola zein Amaia Miranda urriaren 31n. Gainera, urriaren 9an Igor Paskualek masterclass bat emango du CBA Zentroan (20:00etan).
Urriko gainerako ikuskizunei dagokienez, Amaia KZk Anthony Blaken mentalismo saioa hartuko du urriaren 10ean (20:00etan), Atalaya konpainiaren “Divinas palabras” antzezlana urriaren 11n (19:00etan), eta Kulunkaren “Herentzia” urriaren 31n (20:00etan). Musika eta dantza arloan, urriaren 23an “Abbey Road, The Beatles Show” tributu-kontzertua izango da Amaia KZan (20:00etan) eta Compañía Toraren “Amimona” dantza garaikidea CBA Zentroan (20:00etan). Halaber, Irun Hiria Musika Bandak urriaren 25ean arituko da Amaia KZan (12:00etan). Umorearen aldetik, Jon Plazaolak “AA Aita” bakarrizketa aurkeztuko du urriaren 16an CBA Zentroan (20:00etan), eta urriaren 30ean Ezezagunok Antzerki Taldeak Geltoki Elkarrizketa saioa egingo du leku berean (19:00etan), Entrecajas Fusión taldearen “Solo un anuncio” antzezlanarekin batera.
Azaroak operarekin, antzerkiarekin eta zinemarekin jarraituko du. Azaroaren 6an eta 7an Luis Mariano Lirika Elkarteak “Las Bodas de Fígaro” opera antzeztuko du Amaia KZan (18:30ean). Haurrentzat Anita Maravillas taldearen “Tretatxu” izango da azaroaren 6an CBA Zentroan (18:00etan), eta umore zaleentzat Nerea Garmendiaren “Con taras y a lo loco” bakarrizketa azaroaren 13an leku berean (20:00etan). Arte eszenikoei jarraituz, Txalo Produkzioak-en Escape Room antzerkia ikusi ahalko da azaroaren 20an CBA Zentroan (20:00etan). Musika eskaintza Haika Jazz Quartet-en eskutik etorriko da azaroaren 14an (21:00etan), No quiero, Løse eta Diego Vasalloren kontzertuarekin azaroaren 21ean (21:00etan), biak CBA Zentroan, eta Irun Hiria Musika Bandaren Santa Zeziliako emanaldiarekin azaroaren 22an Amaia KZan (12:00etan). Azkenik, azaroaren 29an Azkue Memorialeko organo-kontzertua egingo da Junkaleko elizan (20:00etan), eta azaroaren 16tik 21era bitartean FICAB Bidasosaako Nazioarteko Zinemaldi Arkeologikoaren XXVI. edizioa ospatuko da.
Urtea amaitzeko, abenduak Ara Malikian biolinistaren bi kontzertu handi hartuko ditu Amaia KZan abenduaren 4an (18:30ean eta 21:30ean). CBA Zentroak, berriz, Maite Larburu eta Violeta Veinte elkartuko ditu abenduaren 5ean (21:00etan), DokuIrun Zikloaren barruko “El legado de Ismael” laburmetraia emango du abenduaren 11n (19:00etan), eta Ander Sánchezen clown antzerkia ikusgai jarriko du abenduaren 18an (20:00etan). Bi hilean behingo ohiko “Zure abenturaren bila” hitzaldiek ere beren lekua edukiko dute Amaia KZan (19:30ean ostegunetan): urriaren 8an “Itsasargien argitan”, urriaren 22an Jon Unzuetaren “Viajando sin barreras”, azaroaren 5ean Jorge Gorosarriren “Groenlandia oinez eta kayak-en bidez”, azaroaren 19an Néstor Gómez eta Patricia Ardanuyren “5 años dando vueltas por el mundo”, eta abenduaren 3an Mattin Iñiguezen “Pakistan, ametsen lurraldea”, abenduaren 17an Susana de la Rubia Gómez-en “Vietnam y Camboya” hitzaldiaz gain.
Sarrerak salgai jada
Iragarritako ekitaldietarako sarrerak gaur bertan jarri dira salgai udal webgunearen bitartez. Kulturako zerbitzua abenduko agenda gehiago osatzeko lanean ari denez, herritarrei eta bisitariei jakinarazi zaie egitarau osoa eta eguneratua Udalaren webgune ofizialean egongo dela kontsultagai.
