‘Los Muñecos de la Tarta’ ezkontza-azoka Ficobara itzuliko da asteburu honetan, urriaren 17an eta 18an, bere hamargarren urteurrena ospatzeko. Hamar edizio hauetan zehar, ekitaldia erreferentziazko topagune bihurtu da ezkontza antolatzen ari diren eta inspirazio bila dabiltzan bikoteentzat. Aurten, gainera, parte-hartzeak gora egin du: guztira sektoreko 23 enpresa erakusketarik hartuko dute parte, eta horietatik bederatzi lehen aldiz izango dira bertan, eskaintza zabalduz eta berrituz.
Asteburuan zehar, Ficobako 1. pabiloiak ezkontza-ospakizunekin lotutako era guztietako produktu eta zerbitzuak bilduko ditu gune bakarrean: emaztegai eta senargaien jantziak, bitxiak, oinetakoak, loreak, dekorazioa, argazkilaritza, bideoa, bidaiak, jatetxeak zein animazio-zerbitzuak. Horrez gain, fotomatoiak, DJak, opari pertsonalizatuak, produktu gastronomikoak eta oturuntzaren osteko aisialdirako guneak ere egongo dira. Berritasunen artean, La Visionaria gaztandegiaren, Ballestanea jatetxearen eta Donostiako Arbeloa lore-dendaren partaidetza nabarmentzen da.
Azoka larunbatean eta igandean egongo da zabalik, 11:00etatik 14:00etara goizez eta 16:00etatik 20:00etara arratsaldez. Sarrera doakoa da, baina antolatzaileek aldez aurretik webgunean izena ematea gomendatzen dute , sarbidea arintzeko eta sarreran ilarak saihesteko. Aldez aurretik izena eman ez dutenek ere bertara iristean egin ahal izango dute erregistroa, antolakuntzako langileen laguntzarekin.
