Irungo Udaleko Gazteria arloak, GazteARTEan zerbitzuaren bitartez, gogorarazi du datorren larunbatean, azaroak 7, musika-hitzordu berezia izango dela CBA Kultur eta Sormen Zentroko Irun Zuzenean aretoan, 21:00etatik aurrera. Agertokira Juicy Bae (Cristina Vela) diziplina anitzeko artista gaztea eta Aimar DJ irundarra igoko dira, bertaratutakoei musika urbanoaren eta elektronikoaren azken joerak hurbiltzeko asmoz. Kontzertura joan nahi dutenek udalaren webgune ofizialaren bitartez eskuratu ditzakete sarrerak.
Sónar edo Argentinako Lollapalooza bezalako nazioarteko jaialdietatik igaro ostean, abeslariak bere azken proiektua aurkeztuko du Irunen, 2025eko apirilean plazaratutako ‘El Secreto’ disko arrakastatsuan oinarritua. Lan horretan, artistak bere soinu-esplorazioari eutsi dio musika urbanoa eta esperimentala horizonte berrietara hedatuz. Bere ibilbidean zehar, R&B, afrobeat eta trap erritmoak soul doinuekin zein flamenko-ukituko barrarekin uztartu ditu, bere bilakaera artistiko eta pertsonala islatuz eta estatuko panoramako proposamen ausart eta interesgarrienetako bat gisa kokatuz.
Bertako ukituarekin
Emanaldian bertako talentuak ere lekua izango du, Aimar DJ irundarra arduratuko baita gaua girotzeaz eta berotzeaz. Irunen jaioa, 17 urterekin deskubritu zuen musika elektronikoarekiko grina, batez ere house estiloan eta haren askotariko aldaeretan murgilduz. Duela bi urte baino gehiago N97rekin batera bere ibilbideari ekin zionetik, estilo propioa eta nortasuna sendotzen joan da eszena elektronikoan esperientzia esanguratsuak pilatuz.
