Bidasoa Kirol Elkarteak Klubaren Eguna izendatu du 2026/2027 denboraldiko NEXUS ENERGÍA ASOBAL Ligako 10. jardunaldiko norgehiagoka. Hitzordu berezi honetan, IRUDEK Bidasoa Irunek Barça Ligako egungo txapeldunaren bisita jasoko du Artalekun datorren larunbatean, azaroak 21, arratsaldeko 20:00etan. Aurreko denboraldian gertatu zen bezala, goi-mailako eskubaloi ikuskizuna eta emozio gorena espero dira Irungo kiroldegiko harmailetan.
Sarreren salmenta
Klubaren Eguna denez, bazkideek sarrera berezia eskuratu beharko dute partidara sartzeko. Abonatuek dagoeneko zabalik dute epea —eta datorren asteartera arte, azaroak 17, 13:00ak arte izango dute aukera— euren ohiko eserlekua erreserbatzeko. Kudeaketa hori klubaren aplikazio mugikorreko bazkideen atalaren bidez edo Artalekuko bulegoetan egin daiteke (10:00etatik 13:00etara eta 16:00etatik 18:00etara). Astearteko epe hori igarota, bazkideek sarrera erosten jarraitu ahal izango dute, baina ohiko eserlekua ziurtatuta izan gabe. Abonatuentzako prezioak honako hauek dira: 15 euro heldu eta jubilatuentzat, 12 euro jubenil eta juniorrentzat, eta 10 euro infantilentzat.
Publiko orokorrari dagokionez, sarreren salmenta asteazkenean, azaroak 18, jarriko da martxan. Abonatuak ez diren zaleek klubaren webgune ofizialean edo Artalekuko bulegoetan erosi ahal izango dituzte txartelak, bulegoko ohiko ordutegian. Kasu honetan, 25 urtetik gorakoek 25 euro ordaindu beharko dute, 15 eta 25 urte bitarteko gazteek 20 euro, eta 14 urtera arteko haurrek 15 euro.
