Irun 2026ko Inauteriak ospatzeko motorrak berotzen hasi da. Inauterietako egun handiak iritsi aurretik, Galdaragileak eta Inudeak eta Artzainak izango dira asteburu honetan protagonistak. Gainera, Trikipoteoa eta Diana Bereziak ere hiriko kaleak girotuko dituzte.
Nuria Alzaga lehenengo alkateorde eta Kultura ordezkariak Irungo 2026ko Inauterien aurreko asteburuko jardueren egitaraua aurkeztu du gaur goizean San Juan plazan. Ordezkariarekin batera, jaietako egitarauan parte hartuko duten elkarteetako hainbat ordezkari ere izan dira. Ordezkariak azpimarratu duenez, “Irunek inauterietako gogo handia du, eta asteburu hau hasiera ezin hobea da horretarako”. Kultura ordezkariak nabarmendu du kalean gozatzeko egunak direla, “hiri gisa identifikatzen gaituen giroa konpartitzeko eta sentsazio hura berriz sentitzeko egunak”.
Era berean, Alzagak eskerrak eman dizkie jaiaren antolaketan parte hartzen duten pertsona, talde eta erakunde guztiei egindako lanagatik eta eskainitako dedikazioagatik; izan ere, “horrelakorik ez litzateke posible izango elkarteen eta boluntarioen lanik gabe, Irunen elkarte- eta kultura-sare oso bizia baitugu, betiere Irungo zigiluarekin. Bere ahaleginak festa txoko guztietara eta adin guztietako pertsonengana iristea lortzen du”.
Galdaragileak
Otsailaren 7an, larunbatean, berrikuntza batekin hasiko dira Inauteriak. Eguerdiko 12:00etatik aurrera Euskal Jirak antolatutako Trikipoteoa egingo da Alde Zaharreko inguruan, kaleko animazio handiagoa eskaintzeko helburuarekin.
Arratsaldean, ohi bezala, Irungo Atsegiña elkarteak antolatutako Galdaragileen Konpartsak hiriko erdiguneko kaleetan zehar desfilatuko du. Arratsaldeko 19:00etan Alberto Anguera plazatik abiatuko dira San Juan plazaraino. Bertan, besteak beste, Kemen Dantza Taldeak dantzaldia eskainiko du.
Inudeak eta Artzainak
Festak otsailaren 8an, igandean, jarraituko du, 08:30ean, Irungo Txistulari Taldearen Diana Bereziarekin. Hauek Inauteriekin zerikusia duten hainbat doinu berreskuratuko dituzte.
Ondoren, Inudeak eta Artzainen konpartsa abiatuko da, Eraiki Dantza Taldearen eskutik. 12:00etatik aurrera, Santiago kaletik abiatu eta hiriko erdiguneko kaleak zeharkatuko dituzte, Luis Mariano kalean amaitzeko. Ibilbidean zehar, Jostallu eta Gauerdi txarangek parte hartuko dute eta Udal Kontserbatorioko ikasleek ere parte hartuko dute Zabaltza plazan egiten den dantzaldian. Aipatzekoa da aurten, lehen aldiz, Ondare Elkarteko erraldoiek ere parte hartuko dutela, aurten 15. urteurrena betetzen baitute.
Erakusketak Amaia KZn
Kaleetatik kanpo, Amaia KZ erakustaretoan bi erakusketa egongo dira ikusgai otsailaren 17ra arte. Batetik, ‘Zanpantzarraren irudia denboran zehar’ izeneko erakusketa. Bestetik, aurtengo Inauterietako ediziorako aurkeztutako kartelak.
