Julen Aginagalde CD Bidasoako kirol zuzendariak omenaldia jaso du ostegun honetan Kielceko (Polonia) Hala Legionów pabiloian, 4.000 ikusle ingururen aurrean, EHF Champions Leagueko KS Kielce eta Pick Szeged taldeen arteko partidaren atarian. Aurreko asteartean Polonian Bidasoa Irunek KGHM Chrobry Glogow taldeari irabazi ondoren, Aginagalde Kielceraino joan zen bere talde ohiak omendu zezan.
EHF Champions Leagueko partidaren aurretik, Julen Aginagalde ordubete inguru egon zen zaleekin autografoak sinatzen eta argazkiak ateratzen. Pistan, klubak kamiseta bat eta oroigarri txiki bat oparitu zizkion, eta ondoren, harmailetako batean, irundarraren aurpegia zuen tifo bat altxatu zen. Aginagalde zaletu guztiei zuzendu zitzaien eta, hunkiturik, polonieraz eskerrak eman zizkien maitasun-adierazpen guztiengatik.
Gainera, KS Kielceren museoak aste honetatik aurrera Julen Aginagaldek 2016an klubak irabazitako EHF Champions Leagueko finala jokatzeko erabili zuen elastikoa du. Neurketa horretan irundarrak penalti erabakigarria sartu zuen. Poloniako klubak bere eskuak moldatuko ditu bere museoan ere jartzeko.
Julen Aginagalderen hitzetan, omenaldia “oso polita izan zen. Esperientzia ikaragarria eta zirraragarria izan da. Etxean bezala sentitzen naiz, oso maite ditut kluba, hiria eta zaleak, beti oso ondo tratatu nautenak. Esker oneko hitzak besterik ez ditut”.
Irundarrak EHF Champions League bat (2015/2016) irabazi zuen Kielcen, zazpi Liga titulu jarraian (2014-2020) eta sei Poloniako Kopa jarraian (2014-2019). Polonian ibili ondoren Bidasoa Irun taldeko jokalaria izan zen.
