Irun eta Hondarribiko Udalek, Bidasoa biziriken bitartez, “Bidasoa Eskualdeko Enpresen Emisioen Kalkulua eta Hobekuntza Planen Prestaketa” proiektuaren hirugarren edizioa osatu dute, Gipuzkoako Foru Aldundiko Jasangarritasun Departamentuarekin sinatutako hitzarmenaren barruan. Programa horrek sendotu egiten du eskualdeak deskarbonizazioarekin eta klima-aldaketara egokitzearekin duen konpromisoa.
Zerbitzuen sektorean oinarritutako hirugarren edizio honetan, ostatu eta jatetxeetako tokiko sei enpresak hartu dute parte: Hotel Jaizkibel, Hotel Aitana eta Pensión Europa, Hotel Obispo, Ola Sagardotegia eta Café Irun.
Horiek guztiek 2024. urteari dagokion karbono-aztarna kalkulatu dute (batzuek 2023koa ere bai), eta isuriak murrizteko neurri espezifikoak dituen hobekuntza-plan bat egin dute.Nuria Alzaga Bidasoa bizirikeko presidenteak adierazi duenez, “horrelako proiektuek gure enpresek iraunkortasunarekin duten konpromisoa indartzen dute, eta lehiakortasuna eta ingurumenarekiko errespetua eskutik joan daitezkeela erakusten dute”.
9 hilabeteko lana
9 hilabeteko lan partekatua eta indibiduala izango da emaitza, epe laburreko murrizketa-helburuak izango dituena. Proiektua 2025eko martxoa eta azaroa bitartean garatu da, baterako lana eta laguntza pertsonalizatua uztartuz. Denbora horretan, hiru saio egin dira elkarrekin Bidasoa biziriken (irekiera, lankidetza eta itxiera), banakako bilerez eta enpresa bakoitzera egindako bisitaz gain.Enpresek Trantsizio Ekologikorako eta Erronka Demografikorako Ministerioan (MITECO) izapidetu dute karbono-aztarnaren erregistroa, eta datozen hilabeteetan dagokion zigilua lortzea aurreikusten da.
Egindako hobekuntza-planetan eraginkortasun energetikoaren, hondakinen kudeaketaren, mugikortasun iraunkorraren eta baliabideen optimizazioaren arloko ekintzak sartzen dira, 2027rako urteko isurketak % 25 inguru murrizteko.
Klima-aldaketara egokitzen
Emisioak murrizteaz gain, enpresa-eremuan klima-aldaketara egokitzearen garrantzia landu da, bereziki turismo-sektorean, ingurune naturalarekin, energiarekin eta bisitariaren ongizatearekin duen zuzeneko loturagatik. Bestalde, Estitxu Urtizberea Bidasoa bizirikeko lehendakariordeak nabarmendu duenez, “zerbitzuen sektoreko enpresek karbono-aztarna murrizteko duten konpromisoa erantzukizunaren eta etorkizuneko ikuspegiaren adibide bat da, eskualde osoa eredu ekonomiko iraunkorrago baterantz bultzatzen duena”.
