Azaroaren 23an, Bidasoako herritarrek eskualdeko ur arazketa-sistemaren funtzionamendua gertutik ezagutzeko aukera izango dute. Saneamenduaren Mundu Eguna dela eta, Txingudiko Zerbitzuak-ek herritarrak gonbidatu ditu Atalerrekako Ur Hondakinen Araztegia ezagutzeko bisita gidatuan parte hartzera. Jarduera doakoa da, baina plazak mugatuak direnez, izen ematea Txinzerren webgunearen bidez egin beharko da.
Helburua herritarrei uraren saneamendu eta arazketa lanen inguruko ikuspegi hurbilagoa eskaintzea da, izan ere, osasun publikoa eta ingurumenaren babesa bermatzeko ezinbesteko zerbitzua da eta. Horretarako, bisitak euskaraz zein gaztelaniaz eskainiko dira.
Joan-etorria autobusez egingo da: Irungo Gipuzkoa etorbidetik abiatuko da ibilbidea eta Irunen eta Hondarribian hainbat geldialdi egingo ditu. Bisita bi txandatan antolatuko da. Lehen bisitan, 9:00etatik 12:15era, Hondartzako ponpaketa-estazioa eta Atalerrekako araztegia bisitatuko dira. Bigarren bisitan, 11:15 – 13:45 zuzenean Atalerrekako araztegira egingo da bisita.
Saneamenduaren Munduko Eguna
Azaroaren 19an Saneamenduaren Munduko Eguna ospatzen da, Komunaren Munduko Eguna bezala ere ezagutzen dena. Nazio Batuen aurtengo ekimenaren leloa “Saneamendua mundu aldakor batean” da. Mezua argia da: edozein testuingurutan, komun seguru baterako sarbidea oinarrizko beharra eta giza eskubidea izan beharko luke.
Munduan, oraindik ere, 3.400 milioi pertsonak ez dute saneamendu-zerbitzu seguru eta egokirik, eta 354 milioik aire zabalean egiten dituzte beren beharrak. Gerrak, klima-aldaketa, hondamendi naturalak eta inbertsio-falta egoera hori larriagotzen ari dira, milioika pertsonaren osasuna arriskuan jarriz.
Txingudiko Zerbitzuak-entzat, data hau aukera bat da saneamendu sistema moderno eta iraunkor baten garrantzia aitortzeko, eta Bidasoaren osasuna eta natura ingurunea babesten laguntzen duen eguneroko lanari balioa emateko.
