Bidasoa LHIIko eraikina handituko da, Sindikal zaharraren partzelan beste eraikin bat altxatuz. Horretarako, Irungo Udala Eusko Jaurlaritzaren Hezkuntza sailari partzela doan lagatzea onetsi du. Egun lorategi bat den partzelak 700 m2 ditu guztira, Udalaren jabetzakoa da, eta Alberto Larzabal kaleko 1.zenbakian kokatuta dago, hau da, Bidasoa Lanbide Heziketako Ikastetxe Integratuaren ondoan. Handitze horrekin etengabe hazten ari den lanbide-heziketaren eskariari gorakadari erantzun nahi zaio.
Handitze erabakia Irungo Udalaren osoko bilkuran hartu da gaur goizean eta, hari esker, erantzun egokia emango zaie gure hiriaren eta Bidasoalde osoaren hezkuntza-beharrei. Osoko bilkura amaituta, ikastetxera joan dira Cristina Laborda Irungo alkatea eta Begoña Pedrosa Hezkuntzako sailburua, lagatako partzela bertatik bertara ezagutzera.
Irizpenak bost urteko epea xedatzen du eraikin berria altxatzeko. Eusko Jaurlaritzaren Hezkuntza Sailak eta ikastetxeak berak diseinatuko dute azpiegitura berria. Hari esker, ikastetxea handituko da, eta gurean lanbide-heziketaren eskariak izan duen gorakari erantzungo zaio.
Azpiegitura berri honi esker, ikastetxea hobeto ikusiko da eta sarbidea izango du Elizatxo hiribidetik. Horrela, hiri-ingurunean hobeto integratuta geratuko da, Irungo Udalak hiria berroneratzeko onetsitako jarraibideen arabera. Gainera, eraikin berriaren bidez espazio berri batzuk eskuratuko ditu ikastetxeak, hala nola irakaskuntzarako eremuak, ikasle zein irakasleentzako espazio komunak eta proiektu didaktiko berritzaileak gauzatzeko guneak.
Baldin eta etorkizunean partzela lagatzeko kausa izan diren arrazoietarako erabiltzeari uzten bazaio, lagapena bertan behera geratuko da eta jabetza Udalari itzuliko zaio, igarotako denbora edozein izanik ere.
Hezkuntzaren aldeko erabakia
Irungo alkateak esan duenez, Irungo Udalak “aurrerapauso erabakigarria” egin du gaur lagapen honekin; ezinbesteko urratsa, Irunen eta Bidasoaldean hezkuntza hobetzen jarraitzeko. “Badakigu gero eta handiagoa dela lanbide-heziketaren eskaria, izatez, ikastetxeak berak eskatu digu zabalpen hau, eta seguru gaude Eusko Jaurlaritzaren Hezkuntza Sailarekin lortutako akordio honi esker askotariko aukera gehiago bermatuko zaizkiela herritarrei”, adierazi du Cristina Labordak.
Bestalde, Begoña Pedrosa sailburuaren hitzetan, «Eusko Jaurlaritzarentzat, hezkuntza-azpiegituretan inbertitzea etorkizunean inbertitzea da. Bidasoako LHII handitzeak Irunen Lanbide Heziketa indartzea eta eskualdeko eskariaren hazkundeari erantzutea esan nahi du. Lanbide Heziketa bera sakonki aldatu da azken hamarkadetan, eta Bidasoako zentroak eraldaketa horietara egokitzen jakin du. Erakundeen arteko lankidetza funtsezkoa da hori posible egiteko».
