Irungo Udaleko Obretako, Mantentze Lanetako eta Azpiegituretako Arloak 2026ko Hiriak Landatzeko Kanpaina amaitu berri du. Guztira, 115 zuhaitz landatu dira hiri osoan zehar, gehienbat egoera kaskarrean zeuden edo osasun arazoak zituzten aleak ordezkatzeko helburuarekin. Gorka Álvarez arloko ordezkariak prentsaurrekoan azaldu duenez, ekimen honekin hiriko berdeguneen jasangarritasuna eta segurtasuna bermatu nahi izan dute.
Landaketa honetan 30 espezie desberdin baino gehiago erabili dira, dibertsitatea bultzatzeko eta espezie bakar baten metaketa saihesteko. Aukeraketa egiteko orduan, teknikariek hainbat irizpide zorrotz jarraitu dituzte: zuhaitzek heldutasunean izango duten tamaina, espazio erabilgarria, ingurumen-baldintzak eta egungo zein etorkizuneko klimara egokitzeko gaitasuna. Helburua zuhaitz erresistenteak eta epe luzerako onurak ekarriko dituztenak sustatzea izan da.
Zuhaitz berri hauek aurretik zeuden beste batzuen lekua hartu dute. Ordezkapen horiek egiteko arrazoiak askotarikoak izan dira: ale batzuk lehortuta edo erorita zeuden, beste batzuek onddoek jota edo usteltze prozesuan zeuden, eta hainbat kasutan, kokapen desegokiak zuhaitzaren garapen egokia galarazten zuen. Gainera, segurtasuna lehenetsi da, hausteko edo erortzeko arriskuan zeuden zuhaitzak kenduz. Gorka Álvarezek azpimarratu duenez, arloak lan handia egiten du arrisku horiek garaiz detektatzeko azterketa xehatuen bidez.
Ia auzo guztietan
Esku-hartzea hiriko ia auzo guztietara iritsi da, baina Artia izan da landaketa gehien jaso dituen eremua, 29 ale berrirekin. Ondoren, Dunboa (14 zuhaitz), Antzaran eta Pinudi (10 zuhaitz) eta Erdialdea zein Arbes (9na zuhaitz) nabarmentzen dira. Hiriko beste puntu batzuetan ere eragin du kanpainak, hala nola Alde Zaharran (8), Anaka-Puianan (7), San Migelen (6) edo Katean (6), besteak beste.
Azkenik, Udalak herritarren laguntza eskatu du hiriko zuhaitzak zaintzeko. Obretako eta Mantentze Lanetako Arloak gogorarazi du funtsezkoa dela hiritarrek oharrak bidaltzea egoera txarrean dagoen zuhaitzren bat ikusten badute. Jakinarazpen horiei esker, teknikariek azterketa azkarrak egin ditzakete eta, beharrezkoa bada, zuhaitza ordezkatu, herritarren segurtasuna eta hiriko altzarien osotasuna babesteko.
