Txingudiko Zerbitzuak-ek aurten ere parte hartuko du Bioterra azokan, kontsumo arduratsua, jasangarritasuna eta ingurumenarekiko errespetuzko bizimoduak sustatzen dituen topagunean. Ekainaren 5etik 7ra bitartean Ficoban egingo den erakustazoka honen barruan, bigarren eskuko bizikleten Merka2dasoaren edizio berria antolatuko da. Gipuzkoako Foru Aldundiaren laguntzarekin bultzatutako ekimen honek egoera onean dauden baina erabilerarik gabe geratu diren bizikletei bigarren bizi bat ematea du helburu, herritarren artean mugikortasun jasangarriagoa eta ekonomia zirkularra bultzatuz.
Azokak irauten duen hiru egunetan zehar, bisitariek bigarren eskuko bizikletak ikusi eta erosteko aukera izango dute Ficobako gunean. Bere bizikleta saldu nahi duen pertsona orok aurrez hitzordua hartu beharko du ibilgailua entregatzeko, eta ekainaren 1etik 5era bitartean eraman ahal izango du erakustazokara, goizeko 09:00etatik 14:00etara. Aldez aurretik hitzordurik eskatu ez dutenek ere izango dute bizikleta bertaratzeko aukera azokan bertan, Txingudiko Zerbitzuak-en standean hain zuzen ere. Hala ere, antolakuntzak gogorarazi du merkatuko espazioa mugatua dela eta, ondorioz, jasotako bizikleta guztiak iritsitako orden zorrotzaren arabera jarriko direla salgai.
Merkatuan parte hartu ahal izateko hainbat baldintza bete beharko dira derrigorrez. Alde batetik, bizikletak erosi edo saldu nahi dituzten pertsonek adinez nagusiak izan beharko dute, eta NAN dokumentua zein harremanetarako telefono zenbakia aurkeztu beharko dituzte. Bestetik, salgai jarriko diren bizikletek egoera ezin hobean egon beharko dute eta jabeek ezingo dute 600 eurotik gorako salmenta-preziorik ezarri. Azkenik, oinarriek argi uzten dute bizikletak soilik onartuko direla, patinete elektrikoak edo bestelako osagarriak ekimenetik kanpo utziz. Txingudiko Zerbitzuak-ek herritar guztiak animatu nahi ditu eguneroko keinu txiki hauen bidez ingurumena zaintzen laguntzera.
