Uma Gonjarrek eta Udane Ayestaranek errekor berriak ezarri dituzte asteburu arrakastatsu batean, Ion Mugica eta Aritz Gonzalez klubeko igerilari historikoen agur hunkigarriarekin batera.
Joan den asteburuko igeriketa txapelketek emaitza bikainak eta emozio handiko uneak utzi dizkiote Bidasoa XXI taldeari. Euskal Herriko Alebinen Txapelketan lortutako nagusitasun ukaezinarekin batera, Gipuzkoako Udako Txapelketa Absolutu eta Juniorrean ere garaipen uzta oparoa eskuratu dute kirolariek. Guztira dozenaka domina, titulu autonomiko zein probintzialak eta adin ezberdinetako errekorrak apurtzea lortu dute, taldearen orainaldi indartsua eta etorkizun oparoa agerian utziz.
Euskal Herriko Txapelketan, alebinen taldeak maila ikaragarria erakutsi du taldekako sailkapen orokorrean erabateko nagusitasuna erdietsiz. Bereziki deigarria izan da gizonezkoen sailkapenean bigarrenarekiko egon den alde handia. Garaipen kolektibo honen erakusgarri nagusia domina-zerrenda da: guztira 35 domina lortu dituzte, eta horietatik 12 urrezkoak izan dira. Banakako lanean, Uma Gonjarrek hiru urre eskuratu ditu (400L, 50M eta 200X) eta 13 urteko emakumezkoen errekorra hautsi du 50 metro tximeleta proban. Illes Kocsisek ere lau titulu poltsikoratu ditu (50L, 400L, 100E eta 200X), eta Robert Mendañak garaipena lortu du 200X proban. Erreleboetan ere jaun eta jabe izan dira gizonezkoen 4x100L, 4x200L, 4x100X taldeekin eta 4x100X errelebo mistoarekin.
Udako Gipuzkoako Txapelketa
Bestalde, Udako Gipuzkoako Txapelketan maila bikaina mantendu da, nahiz eta taldeko igerilari nabarmen batzuk deialditik kanpo egon. Kategoria absolutuan 16 titulu eskuratu dituzte igerilariek. Ion Mugicak (50E, 100E eta 200X), Ekain Frantziskok (200M eta 1500L) eta Pablo Cerrok (400L eta 800L) hainbat garaipen pilatu dituzte. Horiekin batera, Maddi Fernandezek (100M), Oier Eizaguirrek (200B) eta Oihan Cabanesek (400X) ere podiumaren gorenera igotzea lortu dute, gizonezkoen zein emakumezkoen hainbat errelebo talderi esker lortutako urreekin batera.
Junior mailako kirolariek ere ez dute maila jaitsi eta beste 19 titulu berri gehitu dizkiote klubaren palmaresari. Oihan Cabanes (100X, 200X eta 400X) eta Oier Eizaguirre (50B, 100B eta 200B) izan dira protagonistetako batzuk, bakoitzak hiru garaipen lortuta. Ekain Frantzisko, Jurdan Gonzalez, Maddi Fernandez, Pablo Cerro, eta Udane Ayestaranek ere euren probetan gailentzea lortu dute, gizonezkoen hiru erreleboen eta emakumezkoen bi krol erreleboen garaipenekin batera. Gainera, aipatzekoa da Udane Ayestaranek 200 metro tximeleta proban egindako erakustaldia, 16 urteko adineko errekor berria ezarri baitu.
Txapelketa indartsu hau, garaipenez haratago, klubaren historian arrastoa utzi duten bi igerilari handiri agur esateko une bihurtu da. Ion Mugicak agur esan dio urari klubean 14 urteko bide emankorra osatu ostean, eta bere ibilbideari leial izanez, bere markarik onena eginez agurtu da 50 metro bizkarreko proban. Era berean, Aritz Gonzalezek ere 12 urteren ondoren kirol profesionala uztea erabaki du, igerileku barruan zein kanpoan taldekide guztientzat eredu ezin hobea eta erreferente handia izan dela erakutsiz.
