Irun 2026ko Sanmartzialetako jardueren azken asteburu jendetsuan murgiltzeko prestatzen ari da. Ekaineko laugarren asteburu honetan espero da herritarren eta bisitarien parte-hartzerik handiena, eta hiriko kale zein plazak jai-giroz blaituko dituzten kultura-, kirol- eta gizarte-arloko 40 proposamen baino gehiago garatuko dira herri osoan zehar. Musikak, tradizioak eta kirolak bat egingo dute irundarrek hainbeste maite dituzten egun hauetan.
Musika eskaintza izango da asteburuko platereko nagusietako bat. Larunbatean, ekainak 27, Henry Mendez arituko da San Juan Plazan eta Sofia Cristo DJ ezagunak indarrak jarriko ditu Urdanibia Plazan. Igandean, ekainak 28, ritmoak ez du etenik izango eta Metrikaren kontzertua hartuko du Urdanibia Plazak, eta Jamaica Show orkestra beteranoak San Juan Plaza girotuko du. Gainera, gazteek euren erreferentziazko gunea izango dute ekainaren 26an eta 27an Santiagoko pilotalekuko Gazteguneko karpan. Bertan, lehiaketak, Gaming Gunea eta tailerrak biltzen dituzten 13 jarduera egingo dira, Serko, Hazas, La Neni DJ Set, eta Tati zein Aimar tokiko DJen eskutik.
Igandean, ekainak 28, LGTBIQ+ Harrotasunaren Nazioarteko Eguna modu berezian ospatuko da Irunen. Festa San Juan Plazan egingo den uraren jaiarekin borobilduko da, baina aurretik, Garazy la Fantasyren ikuskizuna eskainidko du herritarrak girotzeko, Sofia Cristok Urdanibia plazan eskainiko duen kontzertu handiaren aurreko show berezi batean.
Kulturaren alorrak ere protagonismo osoa izango du asteburu osoan zehar. Larunbatean, Betti Gotti Euskara Kultur Elkarteak antolatutako Goitibera Txapelketa jokatuko da San Juan Plazan, eta Eraiki Dantza Taldeak bere ikuskizuna eskainiko du Urdanibia Plazan. Igandean, berriz, Kemen Dantza Taldearen eskutik Ezpata Dantza eta Brokel Dantza zikloa ikusi ahal izango dira. Egun berean, erraldoi eta buruhandien kalejira koloretsuak zeharkatuko du hirigunea Irungo Atsegiña, Ondare Kultur Elkartea eta Bidasoako Erraldoien konpartsen eskutik, Irungo Txistulari Taldearen eta Peña Poteo txarangaren doinuekin lagunduta.
Kirol zaleek ere ez dute aspertzeko astirik izango asteburu indartsu honetan. Ostiralean, ekainak 26, Lur-Alai Klubak antolatutako San Martzial Squash Saria jokatuko da. Larunbatean, hilak 27, kirol eskaintza bikoitzarekin osatuko da eguna: alde batetik, Halterofilia San Martzial Txapelketa jokatuko da Bidasoako Halterofilia Kirol Klubaren eskutik, eta bestetik, Bidasoa Atletiko Taldeak (BAT) urtero arrakastatsua den San Martzialeko Igoera Atletiko ezaguna antolatuko du.
