Bihar, ekainaren 21ean, Koadrila Eguna izango da Irunen, Betti Gotti euskara kultur elkarteak antolaturik. Elkarteak egun osoko egitaraua prestatu du urtero moduan, festak goiz goizetik etenik izan ez dezan.
Eguna goizeko 9:00etan hasiko da, Urdanibia plazan egingo den Koadrilen Gosari herrikoiarekin. 9:30ean Goitiberetako parte-hartzaileen arteko zozketa egingo da, lehiaketaren hurrenkera erabakitzeko. Lehia berriz, goizeko 10:00etan hasiko da, orduan hasiko baita IV. Sari Nagusia Goitibera lehiaketa. Ondoren, Koadrilen kamiseten lehiaketaren sariketaren txanda izango da.
12:00etatik aurrera trikitilariek eta Peña Poteo txarangak alde zaharraren inguruko kaleak musikaz alaituko dituzte. Ficobarako bidea hartzeko kalejira, berriz, 13:15ean hasiko da Urdanibia plazan. 14:15ean Ficobara iritsi eta Herri Bazkariari hasiera emango zaio Ficoban, ohiko Globotxupinazoa eginez.
Arratsaldeko 16:00etan bertan bazkaltzen ez dutenentzat Ficobako ateak irekiko dira, sartzeko 2 euro ordaindu beharko direlarik. Ateak irekitzearekin batera, DJ Balberrek girotze lanak hasiko ditu. 17:00etan Burrunba elektrotxarangako kideek lekukoa hartuko diote, Ficobako 3. pabilioian dantzaldia eskaintzeko. 19:00etan DJ Balber taula gainera itzuliko da. 20:30etatik aurrera Matraka elektrotxarangak Koadrilak erdialdeko itzuleran girotuko ditu. Azkenik, Betti Gottik prestatutako mendariaz gozatu ahalko dute indarrak berreskuratzeko hala eskatu dutenek.
