Txingudi Merkataritza Guneak Donibane Lohizune – Hondarribia Maratoi Erdiari buruzko hitzaldi irekia antolatu du bihar ostegunerako, urriak 15, arratsaldeko 19:00etan. Korrika egitea gogoko duten zaleei zein mugaz gaindiko lasterketa ezaguna hurbilagotik ezagutu nahi duten herritarrei zuzendutako saioa izango da, merkataritza guneko jatetxeen eremuan kokatuta.
Topaketa hainbat ikuspuntutatik runningaren mundura hurbiltzeko gune gisa planteatu da, esperientzia pertsonalak eta kirol-jarduerarekin lotutako aholku praktikoak uztartuz. Solasaldia Xabi Perez Almandozek dinamizatuko du, eta bertan hartuko dute parte Eider Simon eta Beñat Bengoetxea korrikalariek euren ibilbidearen berri emateko, baita Iñigo Fernandez de Barrena mediku espezialistak ere, prestakuntzari eta osasunari buruzko ikuspegi profesionala eskaintzeko.
Gainera, bi herriak kirolaren bidez lotzen dituen proba herrikoian parte hartzea errazteko asmoz, lau dortsal zozkatuko dira hitzaldira bertaratzen direnen artean. Ekimen honen bidez, Txingudi Merkataritza Guneak tokiko kirol-jarduerekin duen lotura berretsi eta inguruko herritarrentzat esperientzia partekatuak eskaintzeko apustuari eutsi dio.
