(Iturria: Txingudi Errugbi Kluba).
Zaisa Txingudik ezin izan dio modu onean ekin Euskal Ligako denboraldi berriari, eta defentsako bonus puntu bakarrarekin itzuli da Arripausuetan Durango B/Mutrikuren aurka jokatutako neurketatik (22-15). Marc Duffrèche eta Iñigo Camarerok zuzendutako taldeak defentsan sendo ekin zion partidari, eta seigarren minutuan “Lutxo” Echevarriak zigor-kolpe bat baliatu zuen bidasoarrak aurretik jartzeko (0-3). Handik gutxira, ordea, arau-hausteek atzera egitera behartu zituzten mugakoak eta etxekoen lehen entsegua iritsi zen (5-3). Ordu erdia beteta, Joao Costak markagailua irauli zuen maul baten ondoren eta Echevarriak zigorra eraldatu zuen (5-10). Atsedenaldiaren atarian, Carlos Lorak txartel horia ikusi zuen, taldea jokalari bat gutxiagorekin utziz lehen zatiaren amaieran.
Bigarren zatian ere diziplina faltak eta akatsek kalte handia egin zioten Txingudiri. 48. minutuan Iñigo Sanchezek aldi baterako kaleratzea jaso zuen plakaketa altu batengatik, eta Durango/Mutrikuk abantaila baliatu zuen lehia berdintzeko (10-10). Bidasoarrek berehala erantzun zuten konbinazio on baten bidez eta Joao Costak bere bigarren entsegua erdietsi zuen (10-15). Hala ere, 64. minutuan etxekoek berriro berdindu zuten partida (15-15), eta 74. minutuan, entsegu-eremutik gertu egindako plakaje-huts baten ondorioz, Durango/Mutrikuk laugarren entsegua eta eraldaketa lortu zituen, behin betiko 22-15ekoa ezarriz. Datorren asteburuan Zaisa Txingudik La Unica B hartuko du Plaiaundin.
Bestalde, Txingudi Errugbi Klubeko emakumezkoen taldeak ere porrota jasan zuen Anoetako Miniestadioan Donostiaren aurka (44-5). Asier Gonzalez, Alba Saiz eta Xabi Castañok gidatutako taldeak lehen minutuetatik borrokatu zuen eta 12. minutuan Maddi Harinak bidasoarren entsegu bakarra gauzatu zuen Leire Muñozek egindako hutsarte baten ostean (10-5). Hala ere, donostiarren hiru laurdenen abiadurak eta kontraeraso zorrotzek lehia hautsi zuten atsedenaldirako (27-5), eta bigarren zatian abantaila handitu zuten etxekoek. Emakumezkoek ere datorren larunbatean, urriaren 24an, jokatuko dute La Unicaren kontra Plaiaundin.
Asteburuko albiste positiboena harrobian izan zen: 16 urtez azpiko taldeak 121-0 irabazi zion Uni Bilbao B taldeari menderatze absolutuko partidan, eta 14 urtez azpikoek sentsazio onekin amaitu zuten Lasarte-Orian jokatutako zazpiko errugbi jardunaldia.
