Txingudiko Zerbitzuek Mugikortasunaren Europako Astearen barruan antolatutako Merka2dasoa ekimenaren edizio berria egingo da datorren igandean, irailaren 20an, Irungo Zabaltza plazan. Topaketa honetan herritarrek bigarren eskuko bizikletak eta patinete elektrikoak erosi zein saldu ahal izango dituzte, ibilgailu hauen berrerabilera sustatzeko eta haien bizitza erabilgarria luzatzeko asmoz.
Salgai materiala jarri nahi dutenek aldez aurretik izena eman beharko dute Txinzerren webgunean. Parte-hartzea doakoa da eta guztira 120 plaza jarri dira eskuragarri. Baldintzei dagokienez, salgai jarritako tresnek erabiliak eta egoera onean egon beharko dute —kaskoak edo txirrindularitza-arropa bezalako osagarririk gabe—, eta gehieneko salmenta-prezioa 600 eurokoa izango da artikulu bakoitzeko. Inskripzio epea irailaren 16ra arte edo plazak bete arte egongo da irekita.
Merkatuaren egunean bertan, saltzaileek 08:30etik 10:00etara bitartean entregatu beharko dute materiala informazio-gunean, aurretik aukeratutako hitzordua errespetatuz. Ondoren, antolakuntzak salerosketa guztiak kudeatuko ditu, eta azoka 10:30etik 14:00etara egongo da zabalik herritar guztientzat ikuskatu eta erosketak egiteko.
