Datorren martxoaren 21ean, Korrika Eguna ospatuko da Irunen, eta hiriko auzo elkarteek paper aktiboa hartu nahi dute ekimena sustatzeko. Horregatik, Elitxu, Larreaundi-Olaberria eta Alde Zaharreko auzo elkarteek indarrak batu dituzte euskararen aldeko “zutabe” indartsu bat antolatzeko.
Ekimen honen helburu nagusia auzoz auzo “ttipi-ttapa” egitea da, hiriko punta desberdinetatik (Artia, Urdanibia eta Katea) abiatuko diren hiru zutabeen bidez. Zutabe hauek auzo guztietatik igaroko dira, azkenik San Juan plazan elkartu eta festa borobiltzeko.
Bilera irekia martxoaren 5ean
Zutabe horietako bat behar bezala koordinatzeko, bilera irekia deitu dute martxoaren 5erako, arratsaldeko 18:30ean, Elitxuko Auzo Elkartean (Euskal Herria hiribidea, 25). Bileraren helburua bizilagun guztiei parte hartzeko aukera ematea eta denon artean proposamenak lantzea da.
Bileran lehenik martxoaren 21eko Korrika Eguna auzoetatik nola bideratu jorratuko dute. Jarraian, auzoak martxan jartzeko dinamikak (“Ttipi-ttapa, ttipi-ttapa…”) landuko dira. Gai zerrendako hirugarren gaia Auzo Elkarteen proposamen zehatzak aurkeztea izango da. Azkenik, ekarpenak jaso eta hurrengo pausoak zehaztuko dira.
Antolatzaileek bizilagun guztiak animatu nahi dituzte bilerara hurbiltzera, zutabea “itzela izan dadin” eta Irun euskalduntzeko bidean auzoen indarra erakusteko.
