Irungo Udaleko Kultura Arloaren eskutik, ostegun honetan, hilak 14, Zure abenturaren bila programaren barruko hirugarren saioa egingo da: “ETIOPÍA: un fascinante viaje a nuestros orígenes”. Oraingo honetan, protagonista Mariela Sánchez izango da. Hitzordua 19:30etan izango da, Irungo Amaia KZko hitzaldi aretoan, eta sarrera doakoa izango da. Interesdunak aretoa bete artean sartu ahalko dira.
Saioa gaztelaniaz izango da, eta “ETIOPÍA: un fascinante viaje a nuestros orígenes” ikus-entzunezkoa proiektatuko da Afrikar herrialdeak duen guztia ikusteko aukera emanez, 60 bat minutuz. Ondoren, solasaldi bat izango da protagonistarekin.
“ETIOPÍA: un fascinante viaje a nuestros orígenes”
Gure jatorriaren sorlekua izateaz gain, Etiopia herrialde liluragarri bezain anitza da. Hitzaldian zehar, Adis Abebaren hiriburu zalapartatsua, Lalibelako harkaitzean zulatutako eliza ikusgarriak, hegoaldeko parke nazionaletan dagoen fauna anitza edo Omo haraneko tribu koloretsuak ezagutuko ditu publikoak. Afrikako herrialde honi buruzko ohiturak eta bitxikeriak ere sakonago ezagutuko dituzte.
Zure abenturaren bila
Zure abenturaren bila bidaia programa bat da, non gonbidatuek beren bizipen eta esperientziak eta, azken batean, bidaiatzeko zaletasuna kontatzen dituzten, abenturako irudien laguntzaz betiere. Programaren barruan, askotariko esperientziak kontatu izan dira, hala nola Antartikara egindako espedizioak, planetako mendirik garaienetara eta zailenetara egindakoak eta askoz ere leku hurbilagoetan egindako irteerak.
