Gaur jakinarazi du Irungo Udalak Ezezagunok Antzerkita Elkartea izango dela 2025eko San Pedro eta San Martzial jaietako agur ofiziala egiteko arduraduna. Erabakia Bozeramaileen Batzordean jakinarazi ostean, erabakiaren berri eman du Cristina Laborda alkateak. Irabazi asmorik gabeko elkarte irundar honek hemezortzi urte daramatza desgaitasun intelektualen bat duten aktoreei antzerkian aritzeko prestakuntza ematen. Gainera, azkenaldian nazioarteko hiru sari irabazi dituzte.
Cristina Labordak aipatu duenez, “aurten, Ezezagunok Antzerki Elkarteak jasotako sari guztiak ikusita, garbi zegoen beraiek arduratu behar zirela jaietako agur ofiziala egiteaz”. Alkateak onartu duenez, hemezortzi urte bete dituen honetan, merezi du errekonozimendu hau. Irungo alkateak goraipatu du urte hauetan guztietan, oztopoak eraistea eta inklusioaren bidean aurrera egitea izan dela Ezezagunok Antzerki Elkartea osatzen duten pertsona guztien lorpen nagusia. Alkateak erantsi duenez, ”ezezagun maite hauek ez dira ezezagunak dagoeneko: Irun osoaren errekonozimendua merezi dute”.
Horrela, ekainaren 23an, astelehenarekin, elkarteko kideek emango dute aurtengo jaiei hasiera ofiziala emateko pregoia, sua piztu aurretik, alkatearekin batera, udaletxeko balkoitik.
Ezezagunok Antzerki Elkartea
Luisma Morenok, Miren Etxeberriak eta Ana Pérezek sustatutako irabazi asmorik gabeko antzerki elkarte irundar bat da, 2007an sortua. Desgaitasun intelektualen bat duten aktoreei antzerkian aritzeko prestakuntza eta jendaurreko antzezpenak egiteko aukera ematea du helburu, baita antzerkiaren berezko dinamiken bidez parte hartzaileei eguneroko bizitzan baliagarriak zaizkien tresnak ematea ere.
Elkartearen arrakasta agerikoa da. Azken biran Exacticamente diversa obrarekin, Alizia lurralde miresgarrian lanaren berrinterpretazio bat, eta hiru sari eskuratu ditu: Egokitzapen edo Egiletzarik Onenaren Saria eta Jantzien Diseinurik Onenaren Saria Juan Mayorga sarietan eta Antonio Morillas sari nazionala, zeinak antzerkiaren munduan balio sozialak sustatzea saritzen duen.
Escenamateur Antzerki Amateurraren Konfederazioak banatzen ditu sari horiek. Alegia, izugarrizko balioa du berauek jaso izana, antzerkiaren munduko jendeak berak (egileek, zuzendariek, koreografoek, aktoreek…) baloratu du-eta Ezezagunok Antzerki Elkartearen lana. Era berean, aipatzekoa da Exacticamente diversa obra Gironako Nazioarteko Antzerki Amateurreko 2024ko Jaialdian parte hartzeko aukeratua izan zela, beste mugarri bat.
Bestalde, maiatzaren 17an, elkarteak hemezortzi urte bete zituen, eta, urtebetetzea eta jasotako sariak ospatzeko, festa bat egin zuen, zeinetan bereziki Ana Pérez aktore, gidoigile eta zuzendaria gogoratu zuen, Ezezagunok Antzerki Elkartearen fundatzaileetako bat, iazko ekainean zendua.
Hona hemen taldea osatzen duten 22 aktoreak: Aritz Hernández, Haritz García, María Ángeles Fernández, Miguel Kubat, Mikel Fiz, Naiara Oronoz, Rafa Benítez (sorreran taldea eratu zuten hamabi kideetako zazpi), Aitor Asensio, Amaia Fernández, Connie Vidal, Igone Urkaregi, Javi Santano, Jessica Mateos, June de la Fuente, Koldo Iñarra, Marina Cordón, Markel Mariezkurrena, Marta Oronoz, Rebeca Lorenzo, Sergio Berne, Jon Roncero eta Jon Cavero.
