Osasun Bidasoa plataformak salatu du Osakidetzak oraindik ez dituela bete pediatriako arreta-eredu berria ezartzeko agindu zituen neurriak. Plataformak salaketa hau egin du haur-urgentziak itxi eta sei hilabete igaro direnean.
2025eko apirilaren 13an, Bidasoako Ospitaleko pediatriako larrialdi zerbitzua itxi zen, 36 urtez 100.000 biztanle inguruko populazioari zerbitzu egokia eskaini ondoren. Ospitalea inauguratu zenetik 2012. urtera arte, ospitaleko pediatren talde batek artatzen zituen larrialdiak. Osakidetzak osasun murrizketen testuinguruan erabaki zuen ospitaleko pediatria zerbitzua ixtea eta osasun-zentroetako pediatrek ospitaleko larrialdiak estaltzera behartzea. Egoera hori bakarra izan zen Osakidetzan eta porrot handia izan zuen. Lehen arretako pediatrek euren kontsultak uztartu behar zituzten ospitaleko guardiekin, eta horrek profesionalen etengabeko ordezkapena ekarri zuen, baldintza hobeak eta lan-baldintza egokiagoak zituzten beste eskualde batzuetara joanez.
Pediatriako larrialdiak itxi aurretik, Osakidetzak haur-arretaren kalitatea hobetzeko konpromisoa hartu zuen, ospitaleko pediatria larrialdiak ixtearen truke. Batetik,
ediatren arreta-ordutegia luzatzea agindu zen, astelehenetik ostiralera 8:00etatik 15:00etara izatetik 8:00etatik 17:00etara izatera igaroz.
Bestetik, Irun Zentroko osasun zentroko larrialdietan (PAC) pediatra batek arreta emango zuela agindu zen astelehenetik ostiralera 17:00etatik 22:00etara, eta larunbat eta jaiegunetan 9:00etatik 22:00etara.
6 hilabete itxieratik
Egoera, pediatriako larrialdiak itxi eta sei hilabete igaro direnean Osasun Bidasoak hainbat gabezia salatu ditu. Batetik, osasun zentroetako pediatra falta salatu du. 2025eko maiatzean pediatra baten plaza kendu zen, 12 izatetik 11 izatera pasa zirelarik. Sei hilabete hauetan pediatra plaza gehienak estali gabe egon dira, eta kasu askotan, soilik larrialdiak artatu dira. Familiek zailtasun handiak izan dituzte larrialdiak ez diren kontsultetarako hitzorduak lortzeko. Ondorioz, azterketa programatu gehienak bertan behera geratu dira.
Bestetik salatu dute ez dela betetzen 8:00etatik 17:00etara bitarteko ordutegia. Irailaren amaierara arte, zenbait egun bakarrik luzatu da pediatren ordutegia 17:00etara. Gaur egun, erizaintzak estaltzen du ordutegia 17:00ak arte, baina askotan hiru zentroetan ez dago pediatrarik ordutegi horretan. Egun horietan, familia-medikuek artatu behar dituzte haur-larrialdiak, nahiz eta ez duten beharrezko prestakuntzarik ezta esperientziarik ere.
Gainera, ez da pediatrarik egon Irun Zentroko PACean. Itxieratik, astelehenetik ostiralera 17:00etatik 22:00etara pediatria-esperientzia duen erizain bat dago, haurrei lehen balorazioa egiten diena eta familia-medikuarengana bideratzen dituena. Ez dago pediatrarik ordutegi horretan, eta larunbatetan eta jaiegunetan ez dago ez pediatriako erizainik ezta pediatrarik ere. Irun Zentroko larrialdien instalazioak ez daude haurrei arreta emateko prestatuta. Bidasoako Ospitalean, pediatria-larrialdiak artatzeko espazioak egokitu ziren, zerbitzua itxi aurretik.
Osasun Bidasoak maiatzean Irunen manifestazioa deitu zuen, eta bertan 12.000 herritar inguruk parte hartu zuten Udaltzaingoaren eta Ertzaintzaren datuen arabera. Plataformatik kezkatuta agertu dira ez Osasun Sailak ez Osakidetzak ez dutelako informaziorik eman hurrengo hilabeteetan egoera hobetuko denik pentsarazteko. Osasun Bidasoak uste du egungo eredua arriskutsua dela haurren arretarako segurtasunerako. Arrisku handia dago gaixo larri bat Donostiako ospitaleko larrialdietara garaiz ez heltzeko. Pediatrian trebatu eta esperientzia duten profesionalen gabezia populazioarentzako kalte larria da. Familia-medikuek haur-larrialdi larriak artatzea temeritate hutsa da.
Bestelako gabeziak
Era berean, Osasun Bidasoa plataformatik haurren eta gazteen psikiatria. Irailaren amaieran haur-psikiatra bat sartu zen, baina bigarren psikiatra-plaza ez da bete. Laguntza ematen zuen psikiatria-erizainari kontratua kendu zaio. Ez dago administrazio-laguntzarik, ezta hezkuntza-zentroekin koordinaziorik ere.
Gainera, Bidasoako Ospitaleak ez du urologia-zerbitzurik. Behar diren 4 urologoetatik, egun 2 bakarrik daude, gainera %50eko dedikazioarekin eta Donostiako ospitalearekin partekatuta. Beste ospitale batzuetako urologoek ordu estrak egiten dituzte arratsalde batzuetan. Ez da ebakuntzarik egiten, eta paziente askok zain jarraitzen dute.
Zainketa-zerrendak faltsutzen direla saltatu dute Osasun Bidasoa plataformatik. Hilabeteak daramatzate traumatologia, kirurgiako eta oftalmologiako kontsultetarako txartelak atxikitzen, pazienteak benetan zain ez daudela ager dadin. Bien bitartean, zainketa-zerrendak handitzen ari dira. Besteak beste, neurologia, pneumologia, mina-unitatea, errehabilitazioa eta otorrinolaringologia zerbitzuek itxaron-zerrenda luzeak dituzte.
Gogoratu behar da ere lehen arretako obrak atzeratzen ari dira. Irun Zentroan 2020ko uztailaz geroztik barrakoietan jarraitzen da. Alarde kaleko eraikin bat prestatzea agindu da, baina ondoen jota 2026 amaieran egongo da erabilgarri. Ez da ezagutzen noiz hasiko diren Oinaurren hirugarren anbulatorioa eraikitzeko lanak.
Ebakuntza gela berri obra hasi gabe dago ere. Duela urtebete itxi zen ospitaleko bigarren solairuko ospitalizazio-unitatea, eta 21 ohe galdu ziren. Ospitalearen ondoan modulu-eraikin bat eraiki zen, baina hilabeteak daramatza erabilera gabe. Ez dago datarik ebakuntza-gela berrien lanak hasteko.
Eskari errepikatuak
Osasun Bidasoak eskatzen du Bidasoako Ospitaleko pediatria-larrialdiak berriro irekitzea, ospitaleko pediatrek artatuta, 2012ra arte bezala eta Gipuzkoako gainerako ospitaleetan egiten den bezala: “OSI Bidasoako kudeaketa-arazoek egungo egoera kaskarra ekarri dute; beraz, zuzendaritza-taldearen aldaketa beharrezkoa da. Eskualdeko profesional sanitarioak, udalak eta Bidasoa eta Bortziriako biztanleak entzun egin behar dira, eta osasun publikoaren arreta-eredu berri eta parte-hartzaile baten definizioan parte hartu behar dute”.
