Gaur goizean aurkeztu du Nuria Alzaga Kultura ordezkari eta lehen alkateordeak Irun Zuzenean Zikloaren bederatzigarren edizioa. Datorren urrian, bost larunbatetan zehar, maila goreneko bederatzi kontzertuk osatuko dute egitaraua, eta Huecco zein Carlos Sadness bezalako artista ezagunak izango dira kartelburu. Jaialdiak iaz abiatutako formatu berritzaileari eutsiko dio, CBA Kultura eta Sormen Zentroko Irun Zuzenean aretoa agertoki nagusi bihurtuz, San Juan plazako doako hasiera-ekitaldiarekin batera.
Programazioa urriaren 3an abiatuko da San Juan plazan Hueccoren doako kontzertuarekin, iaz Bebe artista jaialdiaren amaieran egin zuen bezala. Rock, rumba, reggae eta latin doinuak nahasten dituen ikuskizuna eskainiko du. Hurrengo larunbatean, urriaren 10ean, gazteen txanda izango da GazteARTEanek bultzatutako saioarekin: Jimena Amarillo pop abeslaria eta Biznaga punk rock taldea igoko dira Irun Zuzenean aretoaren taula gainera.
Urriaren 17an, Pipiolas bikotearen dream pop-a eta Carlos Sadness indie pop-aren erreferente nagusiaren doinuak entzungo dira. Urriaren 24an, rock alternatiboaren txanda izango da La Paloma eta La Habitación Roja talde beteranoarekin. Azkenik, urriaren 31n, Garazi Esnaola eta Amaia Miranda euskal artista gazteek itxiko dute zikloa pop alternatiboarekin, folkarekin eta soinu-esperimentazioarekin.
Nuria Alzagak azpimarratu duenez, iazko formatu-aldaketak aro berri bat ireki zuen Irun Zuzenean zikloarentzat, CBAko areto polibalentearen aukera guztiak aprobetxatuz. Ordezkariaren hitzetan, edizio honek finkatutako artistak, ahots berriak eta talentu emergenteak uztartzen ditu, hiri osoan kultura bizi dadin sustatuz. CBAko Irun Zuzenean aretoak (385 pertsona zutik eta 157 eserita hartzeko gaitasuna duenak) ikuskizun hurbila, anitza eta kalitatezkoa eskaintzea ahalbidetzen duela gogoratu du Irungo Udaleko Kultura ordezkariak, CBA Kultura eta Sorkuntza zentroaren eta Irun Zuzenean aretoaren lehen urteurrena betetzear denean.
Sarrerak, prezioak eta bonu berria
Sarrerak gaur bertan, abuztuak 7, jarri dira salgai arratsaldeko 15:00etatik aurrera udal webgunean. Urriaren 3ko Hueccoren saioa doakoa izango da, eta urriaren 10eko gazte-saioak 5,65 euroko prezio berezia izango du. Gainerako egunetarako sarrerak 10 eta 20 euro artekoak dira; bonifikatuekin 7 eta 14 euro artean.
Nobedade nagusi gisa, aurten 40 euroko bonu orokorra (30 euro bonifikatua langabetuentzat, 14 urtetik beherakoentzat, Gazte Txartela edo Familia Ugari dutenentzat) jarri da eskura, kontzertu guztiez modu merkeagoan gozatu ahal izateko.
